দেওবাৰে নিশা ক্ষেত্ৰীৰ ওচৰৰ নলগেদ্ৰাত ২৭নং ৰাষ্ট্ৰীয় ঘাইপথত সংঘটিত ট্ৰেভেলাৰ আৰু মালবাহী ট্ৰাকৰ মাজৰ দুৰ্ঘটনাত মৃত্যুৰ (Death in an accident between a traveler and a cargo truck) সংখ্যা ৭ জনলৈ বৃদ্ধি (death toll rises to 7) পাইছে। আনহাতে, ৬ জন লোক এতিয়াও গুৱাহাটী চিকিৎসা মহাবিদ্যালয় হাস্পতালত চিকিৎসাধীন হৈ আছে। ইয়াৰে ভিতৰত দুজন লোকৰ অৱস্থা সংকটজনক বুলি জিএমচিএইচ কৰ্তৃপক্ষই জনাইছে। উল্লেখ্য যে এই দুৰ্ঘটনাত চাৰিজন লোকৰ থিতাতে মৃত্যু হোৱাৰ লগতে আন দুজন লোকৰ জিএমচিএইচত মৃত্যু হয়।
আনহাতে, গুৱাহাটীৰ এখন ব্যক্তিগত চিকিৎসালয়ত চিকিৎসাধীন হৈ থকা অণিমা ডেকা বৰদলৈ নামৰ মহিলাগৰাকীৰ সোমবাৰে পুৱা মৃত্যু হয়। নিহত ৭ গৰাকী লোকৰ ভিতৰত ছয়গৰাকীক ইতিমধ্যে চিনাক্ত কৰা হৈছে। তেওঁলোক হৈছে গোপাল দাস (জাগীৰোড), ইদ্ৰিছ আলী (উলুবাৰী), ঈশান আলী (সোণাপুৰ), তৌফিকুল আলী (কাঁহিকুছি), অণিমা ডেকা বৰদলৈ (লাহৰিঘাট) আৰু জ্যোতিকা ৰংহাং (কামৰূপ মহানগৰ)। আহতকেইগৰাকী হৈছে জাহিদুল ইছলাম, দীপজ্যোতি নাথ, জিয়াৰুল ইছলাম, অসীম কোচ, ৰঞ্জন মণ্ডল আৰু এজন অচিনাক্ত ব্যক্তি। ইয়াৰে ভিতৰত দীপজ্যোতি নাথ আৰু অচিনাক্ত ব্যক্তিজনৰ স্বাস্থ্যৰ অৱস্থা সংকটজনক বুলি চিকিৎসালয় কৰ্তৃপক্ষই জনাইছে।
উল্লেখ্য যে দেওবাৰে নিশা নগাঁৱৰ পৰা গুৱাহাটী অভিমুখে আহি থকা এখন যাত্ৰীবাহী ট্ৰেভেলাৰ (পঞ্জীয়ন নং AS01-HC-0716) ২৭নং ঘাইপথৰ এটা প্ৰকাণ্ড গাঁতত পৰি নিয়ন্ত্ৰণহীন হেৰুৱাই ডিভাইডাৰৰ ওপৰেৰে ওফৰি গৈ বিপৰীত দিশৰ পৰা আহি থকা এখন মালবাহী ট্ৰাকত (পঞ্জীয়ন নং AS07-BC-4271) প্ৰচণ্ড জোৰে খুন্দা মৰাৰ ফলত এই দুৰ্ঘটনাটো সংঘটিত হয়৷ ইয়াৰ পিছত ঘটনাস্থলীত স্থানীয় লোক আৰু আৰক্ষী উপস্থিত হৈ উদ্ধাৰ অভিযান আৰম্ভ কৰে। দুৰ্ঘটনাটোত ট্ৰেভেলাৰখনত থকা যাত্ৰীসকল গুৰুতৰভাৱে হোৱাৰ লগতে চাৰিজনৰ ঘটনাস্থলীতে মৃত্যু হয়। পৰৱৰ্তী সময়ত আৰক্ষীয়ে যাত্ৰীসকলক উদ্ধাৰ কৰি নিহত আৰু আহতসকলক ততালিকে চিকিৎসালয়লৈ প্ৰেৰণ কৰে।
