কাৰ্বি আংলঙৰ হাওৰাঘাটত সংঘটিত হৈছে এক চাঞ্চল্যকৰ ডকাইতিৰ ঘটনা। নগৰখনৰ মাজমজিয়াত অৱস্থিত এজন শিক্ষকৰ বাসগৃহত বুধবাৰে নিশা প্ৰৱেশ কৰি এটা দুৰ্বৃত্তৰ দলে শিক্ষকজনৰ লগতে তেওঁৰ পত্নীক নিৰ্মমভাৱে আক্ৰমণ চলাই সোণৰ আ-অলংকাৰৰ লগতে এখন বাহনো লুট কৰি নিয়ে।
প্ৰাপ্ত তথ্য মতে, হাওৰাঘাট চৰকাৰী মধ্য ইংৰাজী বিদ্যালয়ৰ প্ৰধান শিক্ষক বিদ্যাৰাম ছিংনাৰৰ বাসগৃহত নিশা প্ৰায় ২ বজাত ৪-৫ জনীয়া এটা ডকাইতৰ দল প্ৰৱেশ কৰি এই দুষ্কাৰ্য সংঘটিত কৰে।
ডকাইতৰ দলটোৱে গ্ৰীলৰ তলা ভঙাৰ পিছত কাঠৰ দুৱাৰ ভাঙি ঘৰৰ ভিতৰত প্ৰৱেশ কৰি বিদ্যাৰাম ছিংনাৰ আৰু তেওঁৰ পত্নী সবিতা টেৰণপীক বান্ধি অতি নিৰ্মমভাৱে প্ৰহাৰ কৰে। এই আক্ৰমণত তেওঁলোক দুয়ো আহত হয়।
ইয়াৰ পিছত তেওঁলোকৰ ঘৰৰ পৰা সোণৰ অলংকাৰসহ মূল্যৱান সামগ্ৰী লুট কৰাৰ লগতে তেওঁলোকৰ মাৰুতি ছুইফট বাহনখনো লৈ যায়। এই ঘটনাত সমগ্ৰ হাওৰাঘাট অঞ্চলত তীব্ৰ চাঞ্চল্যৰ সৃষ্টি হৈছে।
