কাৰ্বি আংলঙৰ ভূমি অবৈধভাৱে দখল কৰাসকলক উচ্ছেদৰ দাবীত ডিফুত প্ৰতিবাদ (Diphu Protest) অব্যাহত আছে। সোমবাৰৰ পৰা আৰম্ভ হোৱা এই প্ৰতিবাদত মঙলবাৰে দ্বিতীয়দিনাও খিলঞ্জীয়া কেইটাবাটাও সংগঠনৰ নেতৃত্বই অংশগ্ৰহণ কৰে। প্ৰতিবাদকাৰীসকলে প্ৰতিবাদস্থলীৰ পৰা বেদখলকাৰীক উচ্ছেদৰ বাবে সজোৰে দাবী উত্থাপন কৰে।
উল্লেখ্য যে কাৰ্বি আংলঙৰ পিজিআৰ-ভিজিৰ (PGR-VGR) ভূমিৰ লগতে চৰকাৰী ভূমিত চলি থকা বেদখল উচ্ছেদৰ দাবীৰে সোমবাৰৰ পৰা দুদিনীয়াকৈ ডিফুত অৱস্থান ধৰ্মঘট কাৰ্যসূচী চলি আছে।
উচ্ছেদ প্ৰসংগত চৰকাৰৰ সৈতে চলি থকা আলোচনা সম্পূৰ্ণ ব্যৰ্থ হোৱা বুলি ঘোষণা কৰি খিলঞ্জীয়া সংগঠনসমূহ পুনৰ প্ৰতিবাদত নামিছে। উল্লেখ্য যে, যেৱা বছৰ কাৰ্বি আংলঙৰ পিজিআৰ-ভিজিআৰ ভূমিত উচ্ছেদৰ দাবীত হোৱা আন্দোলনে হিংসাত্মক ৰূপ ধাৰণ কৰিছিল।
ইয়াৰ পিছতে ৰাজ্য চৰকাৰ আৰু কাৰ্বি আংলং স্বায়ত্তশাসিত পৰিষদে আন্দোলনকাৰীসকলৰ সৈতে কেইবালানিও আলোচনাত মিলিত হৈছিল। কিন্তু এই আলোচনাৰ পৰা কোনোধৰণৰ ফলপ্ৰসূ সিদ্ধান্ত নোলোৱাত জিলাখনৰ খিলঞ্জীয়া ৰাইজ পুনৰ ৰাজপথত আন্দোলনত নামিছে।
