সশস্ত্ৰ পেলেষ্টাইনী সংগঠন হামাছে গাজাত প্ৰশাসনিক কৰ্তৃত্ব ত্যাগ কৰাৰ কথা ঘোষণা কৰিছে। সংস্থাটোৱে সোমবাৰে কয় যে এই প্ৰক্ৰিয়াই ভূমধ্যসাগৰীয় উপকূলীয় ভূখণ্ডত এখন টেকন’ক্ৰেটিক কমিটীয়ে অসামৰিক শাসন স্থাপনৰ পথ প্ৰশস্ত কৰিছে।
হামাছৰ এই সিদ্ধান্তক পশ্চিম এছিয়াৰ বিভিন্ন সংবাদ মাধ্যমে এক বৃহৎ ৰাজনৈতিক পৰিৱৰ্তন হিচাপে বিবেচনা কৰিছে।
হামাছৰ ‘মিডিয়া অফিচ’ৰ মুৰব্বী ইছমাইল আল-টাৱাবতাই কয়, “চৰকাৰৰ জৰুৰীকালীন সমিতিৰ মুৰব্বী মহম্মদ আল-ফাৰাই আনুষ্ঠানিকভাৱে পদত্যাগ দাখিল কৰিছে।” ২০২৫ চনৰ অক্টোবৰ মাহত হামাছ আৰু ইজৰাইলৰ মাজত আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মধ্যস্থতাত স্বাক্ষৰিত যুদ্ধবিৰতি চুক্তিৰ অধীনত এনচিএজিয়ে ‘শান্তি ব’ৰ্ড’ গঠন কৰিছিল।
উল্লেখ্য যে পশ্চিম এছিয়াৰ আন এক পেলেষ্টাইনী ভূখণ্ড ৱেষ্ট বেংক বৰ্তমান পেলেষ্টাইন মুক্তি আন্দোলনৰ নিৰ্বিবাদ নেতা প্ৰয়াত ইয়াছেৰ আৰাফাটে সৃষ্টি কৰা সংগঠন ফাটাহৰ নেতৃত্বত গঠিত মিত্ৰজোঁটৰ নিয়ন্ত্ৰণত আছে।
আন্তঃৰাষ্ট্ৰীয় স্বীকৃতিপ্ৰাপ্ত পেলেষ্টাইন কৰ্তৃপক্ষই এই ভূখণ্ডৰ পৰিচালনা কৰে। ২০০৭ চনত পিএলঅ’ বাহিনীক ৰক্তাক্ত যুদ্ধত পৰাস্ত কৰি হামাছে গাজা নিয়ন্ত্ৰণ কৰে।
ইয়াৰ আগৰ বছৰ ২০০৬ চনত গাজাৰ বিধানসভাৰ নিৰ্বাচনত তেওঁলোকে জয়লাভ কৰিছিল। তাত গাজা প্ৰশাসনিক কৰ্তৃপক্ষও প্ৰতিষ্ঠা কৰে। প্ৰায় দুটা দশকৰ পিছত হামাছে গাজা শাসনৰ দায়িত্ব ত্যাগ কৰে।
