তেলেংগানাস্থিত ষ্টাৰ্টআপ দীপা ডিফেন্সৰ দ্বাৰা নিৰ্মিত অটোমেটিক ৰাইফল ‘উগ্ৰম’ কাৰ্যক্ষম পৰীক্ষাত সফলতাৰে উত্তীৰ্ণ হৈছে। ভাৰতীয় প্ৰতিৰক্ষা গৱেষণা সংস্থা (ডিফেন্স ৰিছাৰ্চ এণ্ড ডেভেলপমেণ্ট অৰ্গেনাইজেশ্যন বা ডি আৰ ডি অ’)ৰ সহযোগত মাত্ৰ ১০০ দিনৰ ভিতৰতে নিৰ্মাণ কৰা এই এছাল্ট ৰাইফলটোৱে গৃহ পৰিক্ৰমা মন্ত্ৰালয়ৰ বিশেষজ্ঞসকলে কৰা ভাৰতীয় সেনাৰ ‘জেনেৰেল ষ্টাফ কোৱালিটেটিভ ৰিকুৱাৰমেণ্ট (জি এছ কিউ আৰ) ট্ৰায়েল’ৰ ‘ব’ৰ্ড ট্ৰায়েল’ত সকলো বতৰত সফলতাৰে উত্তীৰ্ণ হৈছে বুলি চৰকাৰী সূত্ৰই প্ৰকাশ কৰিছে।
ডি আৰ ডি অ’ৰ সহযোগী প্ৰতিষ্ঠান আৰ্মমেণ্ট ৰিছাৰ্চ এণ্ড ডেভেলপমেণ্ট এষ্টাব্লিছমেণ্টৰ (আৰ ডি ই) প্ৰাৰম্ভিক ডিজাইনৰ আধাৰত নিৰ্মাণ কৰা এই ৭.৬২ মিলিমিটাৰ ব’ৰ অটোমেটিক ৰাইফলটো কেন্দ্ৰীয় অৰ্ধসামৰিক বাহিনী আৰু বিভিন্ন ৰাজ্যিক আৰক্ষী বাহিনীৰ বিদ্ৰোহ বিৰোধী বাহিনীৰ (বিশেষ বাহিনী) প্ৰয়োজনীয়তাক মনত ৰাখি প্ৰস্তুত কৰা হৈছে। এই ৫১ কেলিবাৰ ৰাইফলৰ ৰেঞ্জ ৫০০ মিটাৰ আৰু ই অটোমেটিক মোডত দ্ৰুতগতিত গুলী চলাব পাৰে।
বৰ্তমান অৰ্ধসামৰিক বাহিনীৰ মূল অস্ত্ৰ হৈছে ৫.৫৬ মিমি ইনছাছ। থলুৱা প্ৰযুক্তি ব্যৱহাৰ কৰি নিৰ্মিত ইনছাছ ৰাইফলৰ কাৰ্যকৰী ৰেঞ্জ ৪০০ মিটাৰ। কিন্তু ইয়াৰ তুলনামূলকভাৱে লঘু গুলীৰ মাৰাত্মকতা কম বুলি অভিযোগ উত্থাপন হৈছে। গৃহ মন্ত্ৰালয়ৰ সূত্ৰ অনুসৰি, ৭.৬২ মিঃমিঃৰ ‘উগ্ৰম’ উক্ত ব্যৱধান পূৰণ কৰিবলৈ সক্ষম হ’ব।
দীপা ডিফেন্সৰ বিষয়া শ্বিবু জোচেফে কয় যে তেওঁলোকৰ কোম্পানীয়ে ২০২১ চনত ‘উগ্ৰম’ উৎপাদনৰ অনুজ্ঞাপত্ৰ লাভ কৰিছিল আৰু তাৰ পিছত হায়দৰাবাদৰ সমীপত তেলেংগানা চৰকাৰে আবণ্টন দিয়া ১৩ একৰ মাটিত পূৰ্ণাংগ উৎপাদন কেন্দ্ৰ স্থাপন কৰিছে।
উল্লেখ্য যে ২০২৪ চনৰ জানুৱাৰী মাহত ডি আৰ ডি অ’ৰ ‘আৰ্মমেণ্ট এণ্ড কম্বেট ইঞ্জিনিয়াৰিং’ (এ চি ই)ৰ সঞ্চালক প্ৰধান শৈলেন্দ্ৰ গড়ে প্ৰথমে ‘উগ্ৰম’ক জনসাধাৰণৰ মাজলৈ আনিছিল। তেওঁ কয় যে মাত্ৰ ১০০ দিনৰ কষ্টত এই ৰাইফলটো নিৰ্মাণ কৰা হৈছে। ইয়াৰ পিছত ৰাইফলৰ ফলপ্ৰসূতা পৰীক্ষা আৰম্ভ হয়। ডেৰ-দুবছৰ ধৰি চলি থকা পৰীক্ষাত উত্তীৰ্ণ হৈছে ‘উগ্ৰম’।
বৰ্তমান ভাৰতীয় সেনাৰ পদাতিক বাহিনীয়ে মূলতঃ ৰাছিয়াৰ সৈতে যৌথ উদ্যোগত নিৰ্মাণ কৰা এ কে ২০৩ ৰাইফল ব্যৱহাৰ কৰে। কালাছনিকভ ছিৰিজৰ শেহতীয়া সংস্কৰণটো সকলো ধৰণৰ বতৰতে অতি ফলপ্ৰসূ। উত্তৰ প্ৰদেশৰ আমেথিত এই ৰাইফল উৎপাদনৰ কাৰখানা স্থাপন কৰা হৈছে।
কিন্তু কিছুমান বাতৰিত দাবী কৰা হৈছে যে বিগত চাড়ে চাৰি বছৰ ধৰি ৰাছিয়া আৰু ইউক্ৰেইনৰ মাজত হোৱা যুদ্ধই এ কে-২০৩ৰ উৎপাদনত প্ৰভাৱ পেলাইছে। ‘উগ্ৰম’ৰ গেছ চালিত ‘ঘূৰ্ণনশীল বল্ট ব্যৱস্থা’ৰ ওজন চাৰি কিলোগ্ৰামতকৈও কম। ফলত বি এছ এফ, চি আৰ পি এফ, আই টি বি পিৰ সেনাই দুৰ্গম পাহাৰীয়া অঞ্চলতো ইয়াক সহজে কঢ়িয়াই নিব পাৰে।
