বুধবাৰে সমগ্ৰ ৰাজ্যজুৰি পালন কৰা হয় সুধাকণ্ঠ ডঃ ভূপেন হাজৰিকাৰ (Dr Bhupen Hazarika) চতুৰ্দশ মৃত্যুবাৰ্ষিকী। এই উপলক্ষে ৰাজ্য চৰকাৰৰ তৰফৰ পৰা প্ৰতিখন জিলা সদৰ আৰু সমজিলাত বিশেষ কাৰ্যসূচীৰ আয়োজন কৰা হয়।
এই কাৰ্যসূচীৰ অংশ হিচাপে পাঁচ হাজাৰোধিক ব্যক্তিয়ে সমস্বৰে ভূপেন হাজৰিকাৰ ‘মানুহে মানুহৰ বাবে’ গীতটো পৰিবেশন কৰে।
ভূপেন হাজৰিকাৰ মৃত্যুবাৰ্ষিকী উপলক্ষে বুধবাৰে পুৱা জালুকবাৰী ভূপেন হাজৰিকা সমন্বয় ক্ষেত্ৰত উপস্থিত হৈ বিশ্বশিল্পীগৰাকীলৈ শ্ৰদ্ধাঞ্জলি জ্ঞাপন কৰে মুখ্যমন্ত্ৰী ডঃ হিমন্ত বিশ্ব শৰ্মাই। লগতে তাত আয়োজিত বিশেষ অনুষ্ঠানতো মুখ্যমন্ত্ৰীয়ে অংশগ্ৰহণ কৰে।
অসম চৰকাৰৰ সাংস্কৃতিক সঞ্চালকালয়ে আয়োজন কৰা শ্ৰদ্ধাঞ্জলী অনুষ্ঠানত অংশগ্ৰহণ কৰি মুখ্যমন্ত্ৰীয়ে কেইবাটাও গুৰুত্বপূৰ্ণ ঘোষণা কৰে। নিজৰ ভাষণত মুখ্যমন্ত্ৰীয়ে কয় যে মানুহে মানুহৰ বাবে গীতটো কেৱল অসমৰে নহয়, সমগ্ৰ মানৱ জাতিৰ সম্পদ। এই গীতটোৱে সমগ্ৰ মানৱ সমাজৰ গীত হিচাপে স্বীকৃতি পোৱাৰ বাবে ৰাজ্য চৰকাৰে কিছু কাম কৰি আছে।
লগতে কয় যে অসম চৰকাৰে মানুহে মানুহৰ বাবে গীতটো সমগ্ৰ বিশ্বৰ মানৱ সমাজৰ গীত হিচাপে স্বীকৃতি দিবলৈ ৰাষ্ট্ৰসংঘক অনুৰোধ জনোৱাৰ সিদ্ধান্ত গ্ৰহণ কৰিছে এই ক্ষেত্ৰত চৰকাৰে কিছু কাম আগবঢ়াইছে বুলিও উল্লেখ কৰি মুখ্যমন্ত্ৰীয়ে আশা প্ৰকাশ কৰে যে আজি নহ’লেও কাইলৈ ৰাষ্ট্ৰসংঘৰ মানৱতাৰ গীতৰূপে ইয়াৰ স্বীকৃতি লাভ কৰাবলৈ সক্ষম হ’ব ৷
মুখ্যমন্ত্ৰীয়ে লগতে কয় যে ধলা-শদিয়া সংযোগী ভূপেন হাজৰিকা সেতুৰ ওচৰত অসম চৰকাৰে সুধাকণ্ঠ ডঃ ভূপেন হাজৰিকাৰ এটা ১০০ ফুট ওখ প্ৰতিমূৰ্তি স্থাপন কৰিব। ইয়াৰ বাবে লোক নিৰ্মাণ বিভাগে প্ৰস্ততি সম্পূৰ্ণ কৰিছে বুলিও তেওঁ উল্লেখ কৰে।
