ভাৰতীয় সেনাই পহেলগাম আক্ৰমণৰ প্ৰতি কেনে প্ৰতিক্ৰিয়া প্ৰকাশ কৰিব, কেতিয়া আৰু কি লক্ষ্যত আঘাত কৰিব সেই সিদ্ধান্ত ল’ব। প্ৰধানমন্ত্ৰী নৰেন্দ্ৰ মোদীয়ে (PM Modi) মঙলবাৰে নিজৰ বাসগৃহত এখন জৰুৰী বৈঠকত এই বিষয়ত ব্যৱস্থা গ্ৰহণৰ বাবে সেনাক ‘সম্পূৰ্ণ স্বাধীনতা’ প্ৰদান কৰে বুলি সূত্ৰই প্ৰকাশ কৰিছে।
পিটিআয়ে প্ৰকাশ কৰা অনুসৰি, বৈঠকৰ সময়ত প্ৰধানমন্ত্ৰীয়ে ভাৰতীয় সেনাৰ ওপৰত আস্থা প্ৰকাশ কৰে। মঙলবাৰে বিয়লি প্ৰধানমন্ত্ৰীৰ লোক কল্যাণ মাৰ্গস্থিত ৭ নং বাসগৃহত এখন বৈঠক অনুষ্ঠিত হয়।
তাত প্ৰতিৰক্ষা মন্ত্ৰী ৰাজনাথ সিং, ৰাষ্ট্ৰীয় নিৰাপত্তা উপদেষ্টা অজিত ডোভাল, প্ৰতিৰক্ষা মুৰব্বী জেনেৰেল অনিল চৌহান, সেনা প্ৰধান উপেন্দ্ৰ দ্বিবেদী, নৌসেনাৰ মুৰব্বী এডমিৰেল দিনেশ কে ত্ৰিপাঠী, এয়াৰ চিফ মাৰ্শ্বাল অমৰপ্ৰীত সিং উপস্থিত থাকে। সূত্ৰ অনুসৰি, উক্ত বৈঠকতে প্ৰধানমন্ত্ৰীয়ে সন্ত্ৰাসবাদৰ বিৰুদ্ধে যুঁজ দিয়াৰ ক্ষেত্ৰত নিজৰ কঠোৰ স্থিতি স্পষ্ট কৰি দিয়ে। প্ৰধানমন্ত্ৰীৰ বাসগৃহত এই বৈঠক চলি থকাৰ সময়তে কেন্দ্ৰীয় গৃহমন্ত্ৰী অমিত শ্বাহে গৃহ মন্ত্ৰালয়ৰ শীৰ্ষ বিষয়াসকলৰ সৈতে বৈঠক অনুষ্ঠিত কৰি আছিল।
প্ৰধানমন্ত্ৰীৰ সৈতে হোৱা বৈঠকৰ অন্তত শ্বাহ তেওঁৰ বাসগৃহলৈ যায়। খবৰ অনুসৰি তেওঁৰ লগত আছিল ৰাষ্ট্ৰীয় স্বয়ংসেৱক সংঘৰ মুৰব্বী মোহন ভাগৱত।
সূত্ৰসমূহে প্ৰকাশ কৰা অনুসৰি, মঙলবাৰৰ বৈঠকৰ সময়ত প্ৰধানমন্ত্ৰীয়ে দেশৰ সেনাৰ শক্তিৰ ওপৰত আস্থা প্ৰকাশ কৰে।
তেওঁ কয় যে পহেলগাম আক্ৰমণৰ প্ৰতি সঁহাৰি জনাই কোন লক্ষ্যত আঘাত কৰিব, কেনেকৈ, কেতিয়া আক্ৰমণ কৰিব সেই বিষয়ে সেনাই সিদ্ধান্ত ল’ব। ইয়াৰ পূৰ্বেও মোদীয়ে ‘মন কি বাত’ কাৰ্যসূচীত এক শক্তিশালী বাৰ্তা দিয়ে। প্ৰশ্ন উত্থাপন হয়, সেনাই পুনৰ ‘চাৰ্জিকেল ষ্ট্ৰাইক’ কৰিব নেকি?
২০১৯ চনৰ ১৪ ফেব্ৰুৱাৰীত পুলৱামাত সংঘটিত আত্মঘাতী বিস্ফোৰণত ৪০ জন চি আৰ পি এফ জোৱানে প্ৰাণ হেৰুৱাইছিল। ইয়াৰ পিছত ভাৰতীয় সেনাই পাকিস্তানৰ বালাকোটত প্ৰৱেশ কৰি সন্ত্ৰাসবাদী শিবিৰ ধ্বংস কৰে। জইছ-ই-মহম্মদে পাকিস্তান সেনাৰ সহযোগত সেই শিবিৰবোৰ চলাই আছিল।
পহেলগাম আক্ৰমণৰ পিছত এই প্ৰশ্ন উত্থাপন হৈছে যে ‘চাৰ্জিকেল ষ্ট্ৰাইক’ৰ পুনৰাবৃত্তি হ’ব নেকি? এইবাৰ প্ৰধানমন্ত্ৰীয়ে আক্ৰমণৰ প্ৰতি সঁহাৰি জনাবলৈ সেনাবাহিনীক সম্পূৰ্ণ স্বাধীনতা দিয়াৰ পিছত সেই জল্পনা-কল্পনা আৰু অধিক শক্তিশালী হৈ উঠিল।
