শুকুৰবাৰে পুৱা প্ৰায় ১১ বাজি ৩০ মিনিটত ডিলাইত আৰক্ষীৰ তালাচীত উদ্ধাৰ হয় ১ কোটিতকৈ অধিক টকা মূল্যৰ সন্দেহযুক্ত কানি ৷ প্ৰাপ্ত খবৰ অনুসৰি ডিলাই থানা এলেকাৰ ২৯ নং ৰাষ্ট্ৰীয় ঘাই পথৰ ৬ মাইলত আৰক্ষীৰ নিয়মীয়া নাকা তালাচীত উদ্ধাৰ হয় কানিখিনি ৷
মণিপুৰৰ পৰা গুৱাহাটী অভিমুখে গৈ থকা AS 01 MC 0639 নম্বৰৰ ৬ চকীয়া ট্ৰাকত আৰক্ষীয়ে তালাচী চলোৱাৰ সময়ত ট্ৰাকখনৰ ডেছ বোৰ্ডত লুকুৱাই অনা অৱস্থাত ১২ পেকেট সন্দেহযুক্ত কানি উদ্ধাৰ হয় ৷
কানিখিনিৰ ওজন ১১ কেজি ৫০০ গ্ৰাম ৷ ইয়াৰ আনুমানিক বজাৰ মূল্য প্ৰায় ১ কোটিত কৈ অধিক টকা হব বুলি জানিব পৰা গৈছে ৷ কানিখিনি সৰবৰাহৰ লগত জড়িত ট্ৰাক খনৰ চালক অমিত সিঙক আৰক্ষীয়ে আটক কৰিছে ৷
উদ্ধাৰ হোৱা কানিখিনি বোকাজান মহকুমা আৰক্ষী বিষয়া ৰুস্তমৰাজ ব্ৰক্ষ্ম আৰু নিৰপেক্ষ সাক্ষীগণৰ উপস্থিতিত জব্দ কৰা হয় ৷ তদুপৰি এই সন্দৰ্ভত এটা গোছৰ ৰুজো দি তদন্ত অব্যাহত ৰখা হৈছে বুলি আৰক্ষীৰ সূত্ৰে জানিব পৰা গৈছে ৷
