শুকুৰবাৰে মুখ্যমন্ত্ৰী ডঃ হিমন্ত বিশ্ব শৰ্মাই আনুষ্ঠানিকভাৱে মুকলি কৰে ডিব্ৰুগড় সচিবালয়৷ এই সচিবালয়ৰ পৰা উত্তৰ আৰু উজনি অসমৰ নখন জিলাৰ কাম-কাজ তদাৰক কৰা হ’ব৷ আনহাতে, মুখ্যমন্ত্ৰী নিজে এই সচিবালয়ত সপ্তাহত চাৰিদিন উপস্থিত থাকিব৷ আজি সচিবালয়টো উদ্বেধনৰ পিছতে মুখ্যমন্ত্ৰীয়ে নিজৰ কাৰ্যালয়ত বহি কাম-কাজৰ শুভাৰম্ভণি কৰে৷ উল্লেখ্য যে ডিব্ৰুগড়ৰ মাইজানৰ জলসম্পদ বিভাগৰ অতিথিশালাটো মুখ্যমন্ত্ৰীৰ সচিবালয়লৈ উন্নীত কৰা হৈছে৷
এই সচিবালয়ত প্ৰথম বহিয়ে মুখ্যমন্ত্ৰীয়ে ১৬ টাকৈ গুৰুত্বপূৰ্ণ ফাইলত চহী কৰে৷ আনহাতে, কৌইবাখনো জিলাৰ আয়ুক্তক ৰদ-বলৰ নিৰ্দেশো প্ৰদান কৰে৷ লগতে গণৰাজ্য দিৱসৰ দিনা ডিব্ৰুগড়ত মুখ্যমন্ত্ৰীয়ে পতাকা উত্তোলন কৰিব বুলি সংবাদ মাধ্যমৰ আগত জনায় মন্ত্ৰী জয়ন্ত মল্লবৰুৱাই। ডিব্ৰুগড়ৰ মুখ্যমন্ত্ৰীৰ সচিবালয়ত নিজৰ কাৰ্যালয়ত বহি মুখ্যমন্ত্ৰীয়ে চহী কৰা ফাইল আৰু নিৰ্দেশ দিয়া কামৰ কথা সংবাদ মাধ্যমৰ আগত সদৰী কৰে মন্ত্ৰী জয়ন্ত মল্লবৰুৱাই৷ ডিব্ৰুগড় সচিবালয়ৰ পৰায়ে কৰম পূজাত সবেতন ছুটীৰ দিন ঘোষণা কৰে মুখ্যমন্ত্ৰীয়ে৷
আনহাতে, জল জীৱন মিছনৰ এটা ফাইলতো মুখ্যমন্ত্ৰীয়ে চহী কৰাৰ উপৰি হাইড্ৰ’কাৰ্বন বিষয়ৰ পত্ৰত স্বাক্ষৰ কৰি বিভাগীয় মন্ত্ৰীলৈ পত্ৰ প্ৰেৰণ কৰে৷ ইয়াৰ উপৰি অসম ৰাজ্যিক সংগ্ৰহালয় ব্যৱস্থাপনা সমাজ সমস্যা গঠনৰ নিৰ্দেশ, সেৱা সেতুত আবেদনৰ বাবে নিবিদা প্ৰক্ৰিয়াৰ জৰিয়তে তথ্য-প্ৰযুক্তি কোম্পানীবোৰক নিযুক্ত কৰাৰ সিদ্ধান্ত, ডিফু মেডিকেল কলেজত 29 টা পেয়িং কেবিন নিৰ্মাণৰ বাবে ১০.৪৮ কোটি টকা অনুমোদন জনায়৷
ইয়াৰ উপৰি ডঃ ননীগোপাল মহন্তক আদৰ্শ বিদ্যালয়ৰ অধ্যক্ষৰ দায়িত্ব, ঢকুৱাখনাৰ নতুন এছ ডি পি অ’ আৰু অ’চি নিযুক্তি, নাৰায়ণ বৰকটকীক ‘চিটা’ৰ অধ্যক্ষ নিযুক্তি আদি কেইবাটাও নিৰ্দেশনা তথা ফাইলত প্ৰথমদিনাই মুখ্যমন্ত্ৰীয়ে ডিব্ৰুগড় সচিবালয়ত চহী কৰে৷
