২০২৩-২৪ বিত্তীয় বৰ্ষত দেশত ৪ কোটি ৭০ লাখ নতুন চাকৰিৰ সৃষ্টি হৈছে। সোমবাৰে প্ৰকাশিত ৰিজাৰ্ভ বেংকৰ (Reserve Bank) এক প্ৰতিবেদনত এই কথা উল্লেখ কৰা হৈছে। নিয়োগ বৃদ্ধিৰ হাৰো বৃদ্ধি পাইছে। ২০২২-২৩ বিত্তীয় বৰ্ষত এই হাৰ আছিল ৩.২ শতাংশ। যোৱা বিত্তীয় বৰ্ষত এই হাৰ ৬ শতাংশ বৃদ্ধি পাইছে।
ৰিজাৰ্ভ বেংকে ‘ক্লেইমছ’ ডাটাবেছত দাখিল কৰা বিভিন্ন তথ্য বিশ্লেষণ কৰি ২৭টা ক্ষেত্ৰত নিয়োগৰ হাৰ বিশ্লেষণ কৰিছে। এই ২৭টাত কৃষি, মীন, খনন আৰু উৎপাদন আদি গুৰুত্বপূৰ্ণ খণ্ডসমূহ অন্তৰ্ভুক্ত কৰা হৈছে। ৰিজাৰ্ভ বেংকৰ এই তথ্যই অৱশ্যে নতুন বিভ্ৰান্তিৰ সৃষ্টি কৰিছে। কাৰণ শেহতীয়াকৈ ব্যক্তিগত সংস্থা “চিটি গ্ৰুপ ইণ্ডিয়া”ই ভাৰতত নিয়োগৰ হাৰ সম্পৰ্কে এক প্ৰতিবেদন প্ৰকাশ কৰিছে।
প্ৰতিবেদনত দাবী কৰা হৈছে যে ভাৰতৰ অৰ্থনৈতিক বিকাশৰ হাৰ ৭ শতাংশ হোৱাৰ পিছতো কৰ্মসংস্থাপন প্ৰয়োজনৰ দৰে ভাল নহয়। বৰ্তমানৰ অৰ্থনৈতিক বিকাশৰ হাৰ বজাই ৰাখিলে বছৰি ৮০ৰ পৰা ৯০ লাখ চাকৰিৰ সৃষ্টি হ’ব পাৰে বুলিও প্ৰতিবেদনত উল্লেখ কৰা হৈছে। কিন্তু নিবনুৱা সমস্যা ৰোধ কৰিবলৈ অহা দশকত প্ৰতিবছৰে ১২ কোটি চাকৰিৰ প্ৰয়োজন।
সোমবাৰে কেন্দ্ৰীয় শ্ৰম মন্ত্ৰালয়ে অৱশ্যে ব্যক্তিগত সংস্থাটোৰ প্ৰতিবেদন নাকচ কৰে। ‘পিৰিয়ডিক লেবাৰ ফ’ৰ্চ ছাৰ্ভে’ আৰু ৰিজাৰ্ভ বেংকৰ ‘ক্লেইমছ’ ডাটাবেছৰ পৰিসংখ্যা অনুসৰি, ২০১৭-১৮ বিত্তীয় বৰ্ষৰ পৰা ২০২১-২২ বিত্তীয় বৰ্ষলৈকে দেশত ৮ কোটি নতুন চাকৰিৰ সৃষ্টি হৈছে।
