কাৰ্বি আংলং (Karbi Anglong) জিলাত শেহতীয়াকৈ বিশেষভাৱে চৰ্চিত বিষয় হিচাপে পৰিগণিত হোৱা জিলা দুখনৰ পিজিআৰ-ভিজিআৰ ভূমিৰ (PGR-VGR land) বেদখল সন্দৰ্ভত আজি ডিফুত ইতিমধ্যে গঠিত হোৱা উচ্চ ক্ষমতাসম্পন্ন সমিতিৰ এক গুৰুত্বপূৰ্ণ সভা (Important meeting regarding encroachments) অনুষ্ঠিত হয়। বিভিন্ন ৰাজনৈতিক তথা অৰাজনৈতিক দল-সংগঠনৰ প্ৰতিনিধিৰ উপস্থিতিত অনুষ্ঠিত হোৱা সভাখনত পিজিআৰ-ভিজিআৰৰ ভূমি বেদখল সন্দৰ্ভত কেতবোৰ গুৰুত্বপূৰ্ণ সিদ্ধান্ত গ্ৰহণ কৰা বুলি জানিব পৰা গৈছে। বৈঠকৰ অন্তত সংবাদ মাধ্যমৰ সৈতে হোৱা বাৰ্তালাপত কাৰ্বি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে (Tuliram Ronghang) বৈঠকৰ সবিশেষ অৱগত কৰে।
মুখ্য কাৰ্যবাহী গৰাকীয়ে ব্যক্ত কৰা অনুসৰি পিজিআৰ-ভিজিআৰৰ ভূমি বেদখল সন্দৰ্ভত বিষয়টো পৰ্যবেক্ষণৰ বাবে ইতিমধ্যে এক বিশেষ কোষ গঠন কৰা হৈছে। এই বিশেষ কোষক পৰৱৰ্তী পোন্ধৰ দিনৰ ভিতৰত প্ৰতিবেদন দাখিল কৰিবলৈ দিয়া হৈছে। উক্ত প্ৰতিবেদন লাভ কৰাৰ পিছতে উচ্চতম ন্যায়ালয়ৰ নিৰ্দেশনা অনুসৰি ব্যৱস্থা গ্ৰহণ কৰা হʼব বুলি মুখ্য কাৰ্যবাহী গৰাকীয়ে কয়।
আজিৰ বৈঠকত কাৰ্বি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, প্ৰাক্তন সাংসদ ডাঃ জয়ন্ত ৰংপি, হৰেণছিং বেʼ, কাৰ্বি আংলং স্বায়ত্বশাসিত পৰিষদৰ প্ৰাক্তন মুখ্য কাৰ্যবাহী সদস্য জৎচন বেʼ, বিধায়ক ক্ৰমে বিদ্যাছিং ইংলেং, ৰূপছিং টেৰণ, দৰছিং ৰংহাং, প্ৰাক্তন বিধায়ক ডাঃ মানছিং ৰংপি, হলিৰাম তেৰাং, ডঃ ধৰমছিং টেৰণ, দুয়োখন জিলাৰ বিধায়ক সকল, পৰিষদৰ সদস্য, কাৰ্যবাহী সদস্য, কাৰ্বি ছাত্ৰ সন্থা আদিৰ প্ৰতিনিধিসকল উপস্থিত থাকে।
