২০২৭ চনত অনুষ্টিত হ’ব কাৰ্বি আংলং স্বায়ত্তশাসিত পৰিষদৰ নিৰ্বাচন। অৱশ্যে এতিয়ালৈকে নিৰ্বাচনৰ দিন আনুষ্ঠানিকভাৱে ঘোষণা কৰা হোৱা নাই যদিও পাহাৰীয়া জিলাখনত বিজেপিয়ে ব্যাপক নিৰ্বাচনী তৎপৰতা প্ৰদৰ্শন কৰা পৰিলক্ষিত হৈছে৷ আনহাতে, বিজেপিৰ স্থিতি শক্তিশালী কৰাৰ বাবে শাসকীয় দলটোৱে নিৰ্বাচনী ৰণকৌশল প্ৰস্তুত কৰাত ব্যস্ত হোৱা পৰিলক্ষিত হৈছে।
ইয়াৰে অংশ হিচাপে বিৰোধী কংগ্ৰেছ, এপিএছএলচি দলৰ সমৰ্থকক বিজেপিত যোগদান কৰাই সমাগত পৰিষদীয় নিৰ্বাচনৰ বাবে গেৰুৱা দলটো সাজু হৈছে। কাৰ্বি আংলং জিলা বিজেপিৰ উদ্যোগত ডিফুৰ লাংকুন হাবে টাউন হলত আয়োজিত এক যোগদান কাৰ্যসূচীত চিইএম তুলিৰাম ৰংহাং, সাংসদ অমৰছিং তিছ’ৰ লগতে দলৰ জ্যেষ্ঠ নেতৃবৰ্গৰ উপস্থিতিত বিজেপিত যোগদান কৰাসকলক দললৈ আদৰণি জনায়।
