
দীপংকৰ দাস,ডিফু :কাৰ্বি আংলঙৰ সমস্যা মোৰ সমস্যা, অসমৰ সমস্যা। সেয়েহে সদায় কাৰ্বি আংলঙৰ কাষত আছোঁ।আজি কাৰ্বি আংলং দিৱসৰ ৭৫ সংখ্যক বৰ্ষপূৰ্তিৰ মূল অনুষ্ঠানত মুখ্য অতিথি হিচাপে উপস্থিত থাকি মুখ্যমন্ত্ৰী ড° হিমন্ত বিশ্ব শৰ্মাই এই মন্তব্য কৰে।

বিয়লি পাঁচ বজাত ডিফুৰ তাৰালাংছ’ৰ কাৰ্বি পিপলছ হলত অনুষ্ঠিত সভাত ভাষণ প্ৰদান কৰি মুখ্যমন্ত্ৰী শৰ্মাই কয় যে এসময়ত ইয়াত বোমা-গুলীৰ শব্দ আৰু বাৰুদৰ গোন্ধ বিয়পি আছিল। কিন্তু এতিয়া কেৱল উন্নয়নৰ পৰিৱেশ। বৰ্তমান জিলাখনত চিকিৎসা মহাবিদ্যালয়, আইন মহাবিদ্যালয়, নাৰ্ছিং কলেজ আদি সকলো সুবিধা আছে। আজি অসমৰ দ্বিতীয়খন সৈনিক স্কুলৰ আধাৰশিলা স্থাপন কৰা হৈছে।
এতিয়া ইয়াত শিক্ষা আৰু ক্ৰীড়াৰ সংস্কৃতি গঢ় লৈ উঠিছে। ইয়াৰ যুৱ প্ৰজন্মই এতিয়া দেশৰ সৈতে ফেৰ মাৰিব পৰা হৈছে। অনাগত দিনতো এই চৰকাৰে উন্নয়নৰ এই ধাৰা অব্যাহত ৰাখিব বুলি তেওঁ উল্লেখ কৰে।অনুষ্ঠানৰ আৰম্ভণিতে কাৰ্বি আংলং দিৱস উপলক্ষে আয়োজিত বিভিন্ন প্ৰতিযোগিতাৰ বিজয়ীসকলক পুৰস্কৃত কৰাৰ লগতে অনুষ্ঠানৰ মাজতে এম ই আৰু মাধ্যমিক পৰ্যায়ৰ ৭০২ গৰাকী স্নাতক শিক্ষক-শিক্ষয়িত্ৰীক নিযুক্তি পত্ৰ প্ৰদান কৰে মুখ্যমন্ত্ৰীয়ে।
সভাত ভাষণ প্ৰদান কৰি মুখ্য কাৰ্যবাহী সদস্য তথা বিধায়ক ড° তুলিৰাম ৰংহাঙে কয় যে জনজাতিসকলৰ সুৰক্ষাৰ বাবে ষষ্ঠ অনুসূচীভুক্ত অঞ্চলৰ প্ৰয়োজন। কিন্তু ৭৫ বছৰত ভৰি দিয়া কাৰ্বি আংলং জিলাত প্ৰতিটো জাতি-জনগোষ্ঠীয়ে ভাতৃত্ববোধেৰে মিলাপ্ৰীতিৰে বসবাস কৰি আহিছে। বৰ্তমান চৰকাৰৰ দিনত পাৰ্বত্য জিলাখনৰ সৰ্বাংগীণ উন্নয়ন হৈছে বুলিও তেওঁ দাবী কৰে।
সভাত ভাষণ দি প্ৰাক্তন সাংসদ ডাঃ জয়ন্ত ৰংপিয়ে হিমন্ত বিশ্ব শৰ্মাক অসমৰ সৰ্বকালৰ শ্ৰেষ্ঠ মুখ্যমন্ত্ৰী বুলি অভিহিত কৰে। তেওঁ কয় যে মুখ্যমন্ত্ৰীয়ে কাৰ্বি আংলঙক ভালদৰে বুজি পায় আৰু কাৰ্বি আংলঙক বহুতো দিছে। এতিয়া কাৰ্বি আংলঙৰ জনসাধাৰণৰ মনৰ আশা স্বায়ত্তশাসিত ৰাজ্যৰ দাবী পূৰণ কৰিবলৈ তেওঁ মুখ্যমন্ত্ৰীক আহ্বান জনায়।
সভাত সাংসদ অমৰছিং তিছ’, জিলাখনৰ চাৰিগৰাকী বিধায়ক, পৰিষদৰ অধ্যক্ষ ৰাজু তিছ’, কাৰ্যবাহী সদস্যসকল, এমএচি, জিলা আয়ুক্ত, আৰক্ষী অধীক্ষক, পৰিষদৰ কেইবাগৰাকীও প্ৰাক্তন চিইএম, এমএচি, পদ্মশ্ৰী সন্মানপ্ৰাপক ধনেশ্বৰ ইংতি, পখিলা লেকথেপি আৰু কাৰ্বি পৰম্পৰাগত ৰজা লংছিং ৰংহাং উপস্থিত থাকে।
আজিৰ সভাৰ আৰম্ভণিতে মূল আকৰ্ষণ আছিল দুই হাজাৰ কাৰ্বি পুৰোহিত (কুৰুছাৰ)ৰ একেলগে মন্ত্ৰোচ্চাৰণ। সভা সমাপ্ত কৰি মুখ্যমন্ত্ৰী পোনে পোনে ডিফুৰ কাছা ষ্টেডিয়ামলৈ ৰাওনা হয়। তাত কালি গিনিজ বুক অৱ ৱৰ্ল্ড ৰেকৰ্ড গঢ়া ১৫ হাজাৰ শিল্পীয়ে মুখ্যমন্ত্ৰীৰ উপস্থিতিত পুনৰবাৰ ‘নিমছ কেৰুঙ’ নৃত্য প্ৰদৰ্শন কৰে।
মুখ্যমন্ত্ৰীৰ উপস্থিতিত তুলিৰামৰ হাতত গিনিজ ৱৰ্ল্ড ৰেকৰ্ড অৰ্পণ কৰা হয়। ইয়াৰ পিছতে গিনিজ বুক অৱ ৱৰ্ল্ড ৰেকৰ্ডৰ প্ৰতিনিধিসকলে ৰেকৰ্ডৰ প্ৰমাণপত্ৰ মুখ্যমন্ত্ৰীৰ হাতত অৰ্পণ কৰে। আজিৰ দিনটো এক গৌৰৱময় দিন বুলি মন্তব্য কৰে মুখ্যমন্ত্ৰীয়ে।













