পশ্চিম কাৰ্বি আংলং জিলাৰ হামৰেণত সংঘটিত এক জঘন্য কাণ্ড পোহৰলৈ আহিছে। শিক্ষাগুৰুৰ কামনাৰ বলি ছাত্ৰী৷ তাকো এজন, দুজন নহয় চাৰিগৰাকী ব্যক্তিয়ে ধাৰাবাহিকভাৱে সংঘটিত কৰি আহিছিল এই কু-কাণ্ড। নাবালিকা ছাত্ৰীগৰাকীক বিগত দুবছৰ ধৰি দুগৰাকী প্ৰধান শিক্ষকসহ চাৰিজন ব্যক্তিয়ে নিয়মিতভাৱে চলাই আহিছিল যৌন নিৰ্যাতন। এই সন্দৰ্ভত চাৰিওগৰাকী অভিযুক্তৰ বিৰুদ্ধে এজাহাৰ দাখিল কৰা হৈছে৷
পশ্চিং কাৰ্বি আংলং জিলাৰ সদৰ হামৰেণস্থিত এখন আবাসিক প্ৰাথমিক বিদ্যালয়ত অষ্টম শ্ৰেণীত অধ্যয়নৰত এগৰাকী ছাত্ৰীক সময়ে সময়ে যৌন নিৰ্যাতন চলাই অহাৰ অভিযোগ উত্থাপন হৈছে৷ ভুক্তভোগী ছাত্ৰীগৰাকীৰ পৰিয়ালটোৰ চৰম দৰিদ্ৰতাৰ সুযোগ লৈয়ে এই পাষণ্ডকেইটাই চলাই আহিছিল কু-কাণ্ড। অভিযুক্তকেইগৰাকী হৈছে বিদ্যালয়খনৰ প্ৰধান শিক্ষক ৰাজেন ৰংপি, লাংছ’মেপী প্ৰাথমিক বিদ্যালয়ৰ প্ৰধান শিক্ষক বিদ্যাছিং ইংলেং, শিক্ষা বিভাগৰ সহকাৰী গাণনিক বিষয়া ৰবিৰাম টিছ’ আৰু ঠিকাদাৰ জয়ৰাম টিচ্চ’।
এই চাৰি লম্পটে মিলি এই জঘন্য কাণ্ড সংঘটিত কৰি অহাৰ কথা পোহৰলৈ আহে যদিও পৰিতাপৰ বিষয় যে ভুক্তভোগীৰ পৰিয়ালে ৪ আৰু ৫ নৱেম্বৰত হামৰেণ থানাত গোচৰ ৰুজু কৰাৰ পাছতো আজি পৰ্যন্ত আৰক্ষীয়ে অভিযুক্তক গ্ৰেপ্তাৰ কৰা নাই। ইয়াকে লৈ অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে৷ আনকি ৬ নৱেম্বৰত এজন ভাৰপ্ৰাপ্ত আৰক্ষী বিষয়াই অভিযুক্তৰ সৈতে বুজাবুজি কৰিবলৈ ভুক্তভোগী তথা পৰিয়ালক হেঁচা প্ৰদানৰো অভিযোগ উঠিছে। অভিযোগ অনুসৰি, ভুক্তভোগীৰ পৰা এখন কাগজত চহী কৰাই লোৱা হৈছিল৷
ইফালে এই ঘটনাৰ পিছত ভুক্তভোগী কিশোৰীগৰাকীৰ পৰিয়াল তথা আত্মীয় দিশহাৰা হৈ পৰিছে। ইফালে এই ঘটনাৰ সৈতে কাৰ্বি আংলং স্বায়ত্তশাসিত পৰিষদৰ এগৰাকী কাৰ্যবাহী সদস্যৰ আত্মীয় জড়িত থকাৰ বাবে সমগ্ৰ বিষয়টো গাপ দিয়াৰ চেষ্টা চলোৱা বুলি অভিযোগ উঠিছে। কিন্তু জিলাখনৰ বিভিন্ন দল-সংগঠনৰ তীব্ৰ হেঁচাত ১০ নৱেম্বৰতহে গোচৰ ৰুজু কৰা হয়।
ইফালে চৰকাৰী কৰ্মচাৰীকেইজনক নিলম্বন কৰিও তেওঁলোকক গ্ৰেপ্তাৰ নকৰাক লৈ ৰহস্য তথা অঞ্চলটোত তীব্ৰ চাঞ্চল্যৰ সৃষ্টি হৈছে৷ বৃহত্তৰ হামৰেণৰ বিভিন্ন দল-সংগঠনে এই ঘটনাৰ সৈতে জড়িত আটাইকেইজন দোষীক শীঘ্ৰে গ্ৰেপ্তাৰ কৰি কঠোৰতম শাস্তি প্ৰদানৰ দাবী তুলিছে৷
