ষ্টাফ ৰিপ’ৰ্টাৰ: ডিফু
যোৱা 15 ফেব্ৰুৱাৰীত পশ্চিম কাৰ্বি আংলং জিলাৰ খেৰণিত সংঘটিত হোৱা হিংসাত্মক ঘটনাৰ প্ৰতিক্ৰিয়া আজিও অব্যাহত আছে দুয়োখন পাহাৰীয়া জিলাত। কোনো দল-সংগঠনে বন্ধৰ আহ্বান জনোৱা নাই যদিও কালিৰে পৰা 144 ধাৰা জাৰি হৈ থকা কাৰ্বি আংলং আৰু পশ্চিম কাৰ্বি আংলং জিলাত অব্যাহত থাকে বন্ধসদৃশ পৰিৱেশ। ক্ৰমাগত দ্বিতীয় দিনৰ বাবে আজি জিলা দুখনৰ হাট-বজাৰ আদি বন্ধ হৈ থকা পৰিলক্ষিত হয়।
জিলাখনত অৱশ্যে কোনো বিক্ষিপ্ত ঘটনা সংঘটিত হোৱাৰ বাতৰি পোৱা নাই যদিও আজি বকলীয়াঘাটত হাজাৰোধিক লোকে সমদল কৰি খেৰণিত গণতান্ত্ৰিক প্ৰতিবাদ সাব্যস্ত কৰা প্ৰতিবাদকাৰীসকলৰ ওপৰত দুষ্কৃতিকাৰীয়ে চলোৱা নিৰ্যাতনৰ বিৰুদ্ধে প্ৰতিবাদ সাব্যস্ত কৰে। আজি দুপৰীয়াৰ ভাগত বকলীয়াঘাট নগৰৰ মাজেৰে উলিওৱা এই বৃহৎ প্ৰতিবাদী সমদলত অংশগ্ৰহণকাৰী সকলে ʼকাৰ্বি আংলঙত দাদাগিৰি নচলিবʼ, ʼউই ৱান্ট জাষ্টিচ ʼ আদি শ্লʼগানেৰে পৰিৱেশ উত্তাল কৰি তোলে।
আনহাতে, ডিফুত আজি এএছডিচি য়ুথ ফ্ৰন্ট আৰু কাৰ্বি ছাত্ৰ সন্থাই এক সংবাদমেলৰ আয়োজন কৰি খেৰণিত শান্তিপূৰ্ণ প্ৰতিবাদকাৰীৰ ওপৰত গুণ্ডাবাহিনীয়ে নৃশংস আক্ৰমণ চলোৱা বুলি দাবী কৰি ঘটনাৰ সবিশেষ ব্যাখ্যা কৰে। সংগঠনকেইটাই লগতে জিলাখনৰ বিভিন্ন স্থানত থকা পিজিআৰ-ভিজিআৰৰ ভূমি বেদখলমুক্ত কৰাৰ বাবেও দাবী জনায়।
