দিল্লীত (Delhi) এতিয়া অনলাইন ভাড়াত দিব নোৱাৰিব বাইক। ৰাজধানীৰ পৰিবহণ বিভাগে নিষেধাজ্ঞা আৰোপ কৰিছে বাইক টেক্সিত। ফলত যাতায়াতৰ বাবে ওলা (Ola), উবেৰ (Uber) বা ৰেপিডো (Rapido) ৰ দৰে কোম্পানীৰ বাইকৰ ওপৰত নিৰ্ভৰ কৰাসকলে সমস্যাৰ সন্মুখীন হʼব লাগিব।
দিল্লী পৰিবহণ বিভাগে জাননী জাৰি কৰিছে যে বাইক টেক্সিয়ে (Bike & Taxi) যান-বাহন নিয়ম মানি চলা নাই। গতিকে এই সেৱা অনতিপলমে বন্ধ কৰিব লাগে। জাননী অনুসৰি ওলা, উবেৰ, ৰেপিডো বাইকৰ বিৰুদ্ধে বেছিভাগ ক্ষেত্ৰতে মূল অভিযোগ হৈছে যে নন-ট্ৰেন্সপোৰ্ট ৰেজিষ্ট্ৰেচন নম্বৰ থকা বাহন অৰ্থাৎ ব্যক্তিগত বাহন যাত্ৰী পৰিবহণৰ বাবে ব্যৱহাৰ কৰা হৈছে। যিটো পৰিবহণ বিভাগৰ নিয়মৰ বিৰুদ্ধে। ইয়াৰ দ্বাৰা ১৯৮৮ চনৰ মটৰ গাড়ী আইন উলংঘা কৰা হৈছে।
লগতে প্ৰশাসনে জাননীখনত অৱগত কৰিছে যে নিষেধাজ্ঞাৰ পিছতো যদি দিল্লীৰ পথত ওলা, উবেৰ বা ৰেপিডোৰ কোনো দুচকীয়া বাহন চলাচল কৰা দেখা যায় তেন্তে ৫ হাজাৰ টকা জৰিমনা বিহা হʼব। জৰিমনা বিহাৰ পিছত যদি দ্বিতীয়বাৰৰ বাবে বাইকখন চলি থকা দেখা যায় তেন্তে জৰিমনা দুগুণ হʼব। ১০ হাজাৰ টকা জৰিমনা হিচাপে দিব লাগিব। ইয়াৰ উপৰি ন্যূনতম তিনি বছৰৰ বাবে চালকজনৰ ড্ৰাইভিং লাইচেন্স বাতিল কৰা হʼব। ইয়াৰ উপৰি মটৰ গাড়ী আইন, ১৯৮৮ অনুসৰি ওলা, উবেৰৰ দৰে অনলাইন পৰিবহণ সেৱা আগবঢ়োৱা কোম্পানীসমূহৰ ক্ষেত্ৰত ১ লাখ টকাৰ জৰিমনা হʼব।
কিছুদিন পূৰ্বে উচ্চতম ন্যায়ালয়ে মহাৰাষ্ট্ৰত (Maharastra) ৰেপিডোৰ সেৱা নিষিদ্ধ কৰিছিল। বৈধ অনুজ্ঞাপত্ৰ অবিহনে ৰাজ্যত কাম কৰি থকা বুলি অভিযোগ উত্থাপন হয়। ইয়াৰ পিছত চৰকাৰে দিল্লীত বাইক টেক্সি নিষিদ্ধ কৰে।
