তুৰস্ক-চিৰিয়া (Turkey-Syria) সীমান্তৱৰ্তী অঞ্চলত সংঘটিত প্ৰলয়ঙ্কৰ ভূমিকম্পত (Earthquake) নিহতৰ সংখ্যাই ২০০ অতিক্ৰম কৰিলে। আনহাতে, এই মৃত্যুৰ সংখ্যা দ্ৰুতভাৱে আৰু বৃদ্ধিৰ সম্ভাৱনা আছে। কিয়নো ভূমিকম্পৰ প্ৰবল জোকাৰণিত ধ্বংসপ্ৰাপ্ত হোৱা ঘৰত আবদ্ধ হৈ আছে এতিয়াও বহু লোক। তেওঁলোকক উদ্ধাৰৰ কাম ক্ষিপ্ৰ গতিত চলি আছে। কিন্তু বহু লোক এতিয়াও আবদ্ধ হৈ থকাটোলৈ লক্ষ্য কৰি নিহতৰ সংখ্যা বৃদ্ধি পোৱাৰ আশংকা কৰা হৈছে।
উল্লেখ্য, সোমবাৰে পুৱতি নিশা অনুভূত হয় এই কম্পন। কম্পনৰ উৎসস্থল হৈছে দক্ষিণ তুৰস্ক। গাজিয়ানতেপ প্রদেশৰ পূব দিশে নুৰদাগি চহৰৰ পৰা ২৬ কিলোমিটাৰ পূবে ভূগর্ভৰ প্রায় ১৮ কিলোমিটাৰ গভীৰত ইয়াৰ উৎস। ৰিখটাৰ স্কেলত কম্পনৰ মাত্রা আছিল ৭.৮। ইয়াৰ কিছু সময় পিছত আৰু এটি কম্পন অনুভূত হয় মধ্য তুৰস্কত।
ইউনাইটেড ষ্টেটছ জিওলজিকেল ছার্ভেৰ (United States Geological Survey) মতে, দ্বিতীয় কম্পনৰ তীব্রতা আছিল ৬.৭। লেবানন, চিৰিয়া আৰু চাইপ্ৰাছৰ বিভিন্ন অংশত ভূমিকম্প অনুভূত হোৱা বুলি স্থানীয় সংবাদ মাধ্যমত প্ৰকাশ।
উল্লেখ্য, ১৯৯৯ চনৰ পিছত তুৰস্কত এনে ভয়াৱহ ভূকম্প হোৱা নাই। ভূমিকম্পৰ ফলত বহু ঘৰ ধ্বংস হৈছে।
