অহা ৬ অক্টোবৰত অনুষ্ঠিত হ’ব নগাঁও লোকসভা সমষ্টিৰ ভোটগ্ৰহণ (Nagaon Bye Poll)৷ ভাৰতৰ নিৰ্বাচন আয়োগে সোমবাৰে এই কথা ঘোষণা কৰে৷ আনহাতে, অসমৰ নগাঁৱৰ লগতে পশ্চিমবংগ, তামিলনাডু আৰু পুডুচেৰীৰ ৫টা লোকসভা সমষ্টিৰো উপ-নিৰ্বাচনৰ দিন ঘোষণা কৰে নিৰ্বাচন আয়োগে৷ আটাইকেইটা সমষ্টিতে ৬ অক্টোবৰত একেলগে ভোটগ্ৰহণ অনুষ্ঠিত হ’ব আৰু ৯ অক্টোবৰত ভোটগণনা হ’ব৷ ইয়াৰ বাবে মনোনয়ন দাখিলৰ অন্তিম দিন হৈছে ১৬ ছেপ্টেম্বৰ৷ ১৭ ছেপ্টেম্বৰত মনোনয়ন পৰীক্ষা কৰাৰ বিপৰীতে মনোনয়ন প্ৰত্যাহাৰ কৰাৰ অন্তিম দিন হৈছে ১৯ ছেপ্টেম্বৰ৷ এই নিৰ্বাচনৰ তাৰিখ ঘোষণা হোৱাৰ লগে লগে সংশ্লিষ্ট জিলাসমূহত তাৎক্ষণিকভাৱে কাৰ্যকৰী হোৱাকৈ নিৰ্বাচনী আচৰণ বিধি বলৱৎ কৰা হৈছে।
উল্লেখ্য যে ২০২৪ চনৰ লোকসভা নিৰ্বাচনত কংগ্ৰেছ নেতা প্ৰদ্যুৎ বৰদলৈয়ে নগাঁও লোকসভা সমষ্টিৰ পৰা প্ৰতিদ্বন্দ্বিতা কৰি জয়ী হয়৷ কিন্তু ২০২৬ চনৰ ১০ ফেব্ৰুৱাৰীত সাংসদ পদ ত্যাগ কৰি বিজেপি দলত যোগদান কৰে। ইয়াৰ পিছত সদ্যসমাপ্ত বিধানসভা নিৰ্বাচনত দিছপুৰ বিধানসভা সমষ্টিৰ পৰা প্ৰতিদ্বন্দ্বিতা আগবঢ়াই জয়ী হয়৷ ফলত এই আসনখন খালী হোৱাত উপ-নিৰ্বাচনৰ প্ৰয়োজন হয়৷ আনহাতে, মেঘালয়ৰ শ্বিলং আৰু পশ্চিমবংগৰ বচিৰহাট লোকসভাৰ আসন দুখন বৰ্তমান খালী হৈ আছে যদিও তাত এতিয়াও ভোটগ্ৰহণৰ দিন ধাৰ্য কৰা হোৱা নাই।
–
