ভয়ংকৰ ভূমিস্খলনৰ ফলত যোৱা ৪ ছেপ্টেম্বৰৰ পৰা মিজোৰামৰ সৈতে ৰে’ল যোগাযোগ সম্পূৰ্ণৰূপে ব্যাহত হৈ আছে। ক্ষতিগ্ৰস্ত ৰে’লপথ পুনৰুদ্ধাৰ কৰি যোগাযোগ স্বাভাৱিক কৰিবলৈ ৭ৰ পৰা ১২ দিন পৰ্যন্ত সময় লাগিব পাৰে বুলি ৰে’লৱে সূত্ৰই জানিবলৈ দিছে।
হাইলাকান্দি জিলাৰ ৰামনাথপুৰ ৰে’ল ষ্টেচনৰ সমীপত হোৱা ভূমিস্খলনত প্ৰায় ৬০ মিটাৰ দৈৰ্ঘ্যৰ ৰে’লপথ গুৰুতৰভাৱে ক্ষতিগ্ৰস্ত হৈছে। ক্ষতিগ্ৰস্ত স্থানটো ৰামনাথপুৰ ৰে’ল ষ্টেচনৰ পৰা প্ৰায় ২.৫ কিলোমিটাৰ দূৰত।
দুৰ্গম অঞ্চলটোৰ ক্ষতিগ্ৰস্ত স্থানলৈ যোৱাৰ বাবে ওচৰে-পাজৰে কোনো উপযুক্ত পথ নথকাত মেৰামতিৰ কাম অধিক জটিল হৈ পৰিছে। ৰে’লপথেৰেই JCB-সহ বিভিন্ন গধুৰ যন্ত্ৰপাতি ঘটনাস্থলীলৈ লৈ যোৱা হৈছে।
উত্তৰ-পূব সীমান্ত ৰে’লৱেই যুদ্ধকালীন তৎপৰতাৰে দিন-ৰাতি মেৰামতিৰ কাম অব্যাহত ৰাখিছে। প্ৰায় ২০খন JCBৰ লগতে অন্যান্য গধুৰ যন্ত্ৰপাতি ব্যৱহাৰ কৰি ৰে’লপথ পুনৰুদ্ধাৰৰ কাম চলাই থকা হৈছে।
ইফালে, নেৰানেপেৰা বৰষুণ আৰু পুনৰ ভূমিস্খলনৰ আশংকাই মেৰামতিৰ কামত বাধাৰ সৃষ্টি কৰিছে। ৰে’লৱেৰ এগৰাকী বিষয়াই জনোৱা মতে, বতৰ অনুকূল থাকিলে প্ৰায় ৭ দিনৰ ভিতৰত ৰে’লপথ পুনৰ চলাচলৰ উপযোগী কৰি তুলিব পৰা যাব। কিন্তু বতৰ বেয়া হৈ থাকিলে আৰু দুৰ্গম ভৌগোলিক পৰিস্থিতিৰ বাবে এই কাম সম্পূৰ্ণ কৰিবলৈ ১২ দিন পৰ্যন্ত সময় লাগিব পাৰে।
ৰে’লপথ বিচ্ছিন্ন হৈ পৰাৰ ফলত বৰ্তমান মিজোৰামলৈ কোনো যাত্ৰীবাহী বা মালবাহী ৰে’ল চলাচল কৰিব পৰা নাই।
গুৰুত্বপূৰ্ণ ছাইৰাং–গুৱাহাটী আৰু ছাইৰাং–কলকাতা এক্সপ্ৰেছ ৰে’ল দুয়োখনেই বৰ্তমান হাইলাকান্দিলৈকে চলাচল কৰি আছে।
