দেওবাৰে নিশা অমৃতসৰ বিমানবন্দৰৰ (Amritsar Airport) আকাশত হঠাতে একাধিক ড্ৰ’ন দেখা পোৱাৰ ফলত প্ৰায় ডেৰ ঘণ্টাৰ বাবে বিমান সেৱা বন্ধ হৈ পৰে। আনহাতে, ৭ খন বিমানৰ গতিপথ সলনি কৰা হয়। পিছত পৰিস্থিতি স্বাভাৱিক হোৱাৰ লগে লগে বিমান সেৱা পুনৰ আৰম্ভ কৰা হয়।
বিমানবন্দৰৰ পৰিচালক অনিৰুদ্ধ কুমাৰ শৰ্মাই এএনআইক দিয়া এক সাক্ষাৎকাৰত কয় যে ভাৰতীয় বায়ুসেনাই নিশা প্ৰায় ৯.৪৫ বজাত ড্ৰ’ন দেখাৰ বিষয়ে এয়াৰ ট্ৰেফিক কণ্ট্ৰ’লক অৱগত কৰে। তেতিয়ালৈকে অমৃতসৰৰ আকাশত অৱতৰণৰ বাবে ঘূৰি ফুৰিছিল সাতখন বিমান।
ড্ৰ’ন সন্দৰ্ভত বিমানবন্দৰৰ মানক পৰিচালনা পদ্ধতি (এছ অ’ পি) অনুসৰি নিয়ন্ত্ৰণ টাৱাৰত তৎক্ষণাত যুটীয়া কাৰ্যকৰী সমিতিৰ বৈঠক অনুষ্ঠিত হয়। আশংকা কৰা হৈছিল যে ড্ৰ’নে বিমান অৱতৰণ কৰাত সমস্যাৰ সৃষ্টি কৰিব পাৰে। তাৰৰ পিছতে নিশা ৯.৫০ বজাৰ পৰা বিমান সেৱা বন্ধ কৰি দিয়া হয়। সেই সময়ত মাজআকাশত থকা সাতখন বিমানৰ গতিপথ সলনি কৰি দিয়া হয়। দুখন বিমান চণ্ডীগড়লৈ আৰু পাঁচখন বিমান দিল্লীলৈ যাবলৈ দিয়া হয়।
নিশা ১১ বজাত যুটীয়া কাৰ্যকৰী সমিতিয়ে পৰিস্থিতি পুনৰীক্ষণ কৰি কোনো নতুন ড্ৰ’ন দেখা নোপোৱাত নিশা ১১.১৫ বজাত পুনৰ বিমান সেৱা আৰম্ভ হয়। গতিপথ সলনি কৰা ৭খন বিমানৰ ভিতৰত ৫খন বিমান পুনৰ অমৃতসৰলৈ উভতি যায়। আনহাতে, দিল্লীলৈ প্ৰেৰণ কৰা এয়াৰ ইণ্ডিয়াৰ বিমানকেইখন বাতিল কৰা হয়। ড্ৰ’ন ক’ৰ পৰা আহিছিল তাৰ তদন্ত আৰক্ষীয়ে অব্যাহত ৰাখিছে।
