“পাঠান নে অনুৰ”( Pathan or Anur) বুলি শেহতীয়াকৈ ছ’চিয়েল মিডিয়াত এক খলকনিৰ সৃষ্টি হৈছে। য’ত এপিনে খুদ বলীউডৰ কিং শ্বাহৰুখ খানে ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাক ফোন কৰি “পাঠান” ৰ মুক্তিক লৈ কাণষাৰ দিবলৈ আহ্বান জনাইছে তাতেই আকৌ অহা ২৭ জানুৱাৰী তাৰিখে মুক্তি পাবলগীয়া অসমীয়া “অনুৰ” ছবিখনে ছবিগৃহত এটা ভাল শ্লট বিচাৰি হাবাথুৰি খাবলগীয়া হৈছিল।
কিন্তু এই যুদ্ধৰ শাম কাটিছে। অহা ২৭ তাৰিখে মুক্তিপাবলগীয়া “অনুৰ” ছবিখনক ৰাজ্যৰ ৩১ টা চিনেমা হ’লত মুক্তি দিয়া হ’ব বুলি জানিব পৰা গৈছে।উল্লেখ্য যে, বিশিষ্ট লেখিকা তথা সাংবাদিক অনুৰাধা শৰ্মা পূজাৰীৰ চুটিগল্পক লৈ নিৰ্মিত এই ছবিখনৰ পৰিচালনাৰ দায়িত্বত থকা মঞ্জুল বৰাই ২০২২ ৰ মে’ মাহতেই ছবিখনৰ মুক্তিৰ তাৰিখ ঘোষণা কৰিছিল।
কিন্তু এইখিনিতে, “পাঠান” ৰো একে সময়তে মুক্তিৰ তাৰিখ ওলোৱাৰ হেতু এক শক্তিশালী লবিৰ পৰিপ্ৰেক্ষিতত “অনুৰ” মুক্তিৰ বাবে চিনেমা হ’ল কৰ্তৃপক্ষই সময় প্ৰদান কৰা নাছিল।
এনে চৰ্চা আৰু প্ৰতিক্ৰিয়াৰ ওচৰত সেও মানি এই চক্ৰটোৱে বাধ্যত পৰি পৰিচালকগৰাকীয়ে বিচৰা ধৰণে ৰাজ্যৰ ৩১ টা ছবিগৃহত ছবিখন মুক্তি দিবলৈ সিদ্ধান্ত লয়।শেহতীয়াকৈ এই ছবিখনে কেৰালা আন্তঃৰাষ্ট্ৰীয় চলচিত্ৰ মহোৎসৱতো সুনাম কঢ়িয়াইছে।