অসমৰ কাব্য জগতক উকা কৰি, কবিতাৰ ঋষি নীলমণি ফুকন (Nilamani Phukan) গ’লগৈ অজান মুলুকলৈ । গোলাপী জামুৰ লগ্নৰ কবি গৰাকীয়ে বৃহস্পতিবাৰে জিএমচিএইচত শেষ নিশ্বাস ত্যাগ কৰে । মৃত্যুৰ সময়ত তেওঁৰ বয়স আছিল ৯০ বছৰ ।
উল্লেখ্য, গুৰুতৰভাৱে অসুস্থ কাব্যঋষি নীলমনি ফুকনৰ মঙলবাৰৰ পৰা স্বাস্থ্যৰ অধিক অৱনতি ঘটে ৷ বুধবাৰে নিশা স্বাস্থ্যৰ অধিক অৱনতি ঘটাত নিজা বাসগৃহৰ পৰা গুৱাহাটীৰ সঞ্জীৱনী চিকিৎসালয়লৈ স্থানান্তৰ কৰা হয় ৷ তাৰ পিছত তেওঁক জিএমচিএইচত ভৰ্তি কৰোৱা হয় ।বিগত কেইবা দিন ধৰি বাৰ্ধক্যজনিত ৰোগত ভুগি আছিল যশস্বী কবিগৰাকী ৷ তাৰ মাজতে মঙলবাৰে দুপৰীয়া 2 মান বজাৰ পৰা হঠাৎ অধিক অসুস্থ হৈ পৰে কাব্যঋষিগৰাকী ৷
নতুন দিল্লীৰ বিজ্ঞান ভৱনত অনুষ্ঠিত জ্ঞানপীঠ বঁটা প্ৰদান অনুষ্ঠানত তেওঁ অসুস্থতাৰ বাবে উপস্থিত থাকিব নোৱাৰাত 2022 বৰ্ষত গুৱাহাটীত তেওঁক বঁটা প্ৰদান কৰা হয় ৷ গুৱাহাটীৰ ৰবীন্দ্ৰ ভৱনত আয়োজিত বঁটা প্ৰদান অনুষ্ঠানত কাব্যঋষিগৰাকীৰ হাতত জ্ঞানপীঠ বঁটা তুলি দিয়ে ভাৰতীয় জ্ঞানপীঠ অকাডেমিৰ বাছনি সমিতিৰ অধ্যক্ষ ড৹ প্ৰতিভা ৰয়ে৷আনহাতে, যশস্বী কবিগৰাকীলৈ 2019 বৰ্ষৰ 19 আগষ্টত ডিব্ৰুগড় বিশ্ববিদ্যালয়ে প্ৰদান কৰে সন্মানীয় ‘ডি লীট’ সন্মান ৷অসমীয়া কাব্য-সাহিত্যত নীলমণি ফুকনৰ উল্লেখযোগ্য সৃষ্টিসমূহৰ ভিতৰত ‘সূৰ্য হেনো নামি আহে এই নদীয়েদি’, ‘কবিতা’, আৰু ‘গোলাপী জামুৰ লগ্ন’ উল্লেখযোগ্য ।
তেওঁৰ আন কবিতাপুথিসমূহ হ’ল নিৰ্জনতাৰ শব্দ, ১৯৬৫ আৰু কি নৈঃশব্দ্য্, জাপানী কবিতা, ফুলি থকা সূৰ্যমুখী ফুলটোৰ ফালে, কাঁইট গোলাপ আৰু কাঁইট, গাৰ্থিয়া লৰ্কাৰ কবিতা, নৃত্যৰতা পৃথিৱী, চীনা কবিতা, অলপ আগতে আমি কি কথা পাতি আছিলোঁ আদি । নীলমণি ফুকনৰ জন্ম হৈছিল গোলাঘাট জিলাৰ দেৰগাঁৱত ১০ ছেপ্টেম্বৰ ১৯৩৩ চনত । ইতিহাস বিষয়ত ১৯৬১ চনত গুৱাহাটী বিশ্ববিদ্যালয়ৰ পৰা স্নাতকোত্তৰ ডিগ্ৰী লাভ কৰে তেওঁ ।
‘কবিতা’ শীৰ্ষক স্বনিৰ্বাচিত কাব্যগ্ৰন্থৰ কাৰণে তেওঁক ১৯৮১ চনত সাহিত্য অকাডেমি বঁটা প্ৰদান কৰা হয় ৷ ১৯৯০ চনত ভাৰত চৰকাৰে পদ্মশ্ৰী সন্মানেৰে সন্মানিত কৰে ৷ ইয়াৰোপৰি ১৯৯১ চনত ছগনলাল জৈন বঁটা, ১৯৯৭ চনত অসম উপত্যকা সাহিত্য বঁটা আৰু সাহিত্য অকাডেমিৰ ফালৰ পৰা শ্ৰেষ্ঠ সাহিত্যিক সন্মান সাহিত্য অকাডেমিৰ ফেল’ ২০০২ চনত প্ৰদান কৰা হয় ৷
