আজি গুৱাহাটীৰ আমবাৰীস্থিত অসম চৰকাৰৰ হস্ততাঁত আৰু বস্ত্ৰ বিভাগৰ উদ্যোগত (Industries of The Department of Handlooms and Textiles, Government of Assam) এক বিশেষ কাৰ্যসূচী গ্ৰহণ কৰা হয়। ৰাজ্যৰ শিপিনীসকলক উৎসাহিত কৰিবৰ বাবে ‘স্বনির্ভৰ নাৰী’ শীৰ্ষক এক আঁচনি হাতত লৈছে ৰাজ্যৰ হস্ততাঁত আৰু বস্ত্ৰ বিভাগে।
ৰাজ্যৰ হস্ততাঁত খণ্ডক উৎসাহিত কৰাৰ লক্ষ্যৰে হস্ততাঁত আৰু বস্ত্ৰ বিভাগৰ দ্বাৰা আয়োজিত এই ‘স্বনির্ভৰ নাৰী’ আঁচনিৰ শুভাৰম্ভণি কৰে মুখ্যমন্ত্ৰী ডঃ হিমন্ত বিশ্ব শৰ্মাই। আচঁনিখন উদ্বোধন কৰি মুখ্যমন্ত্ৰীয়ে কয়, “এই পদক্ষেপৰ জৰিয়তে আমাৰ চৰকাৰে স্থাপন কৰা ১০০টা ক্ৰয় কেন্দ্ৰত অসমৰ ৪.৮ লাখ শিপিনীৰ পৰা গামোচা/আৰনাই আৰু অন্যান্য একে ধৰণৰ হস্ততাঁত সামগ্ৰী ক্ৰয় কৰিব।
আমাৰ থলুৱা শিপিনীসকলক অৰ্থনৈতিক সুৰক্ষা প্ৰদানৰ লগতে পাৱাৰলুমৰ আগ্রাসনৰ পৰা অসমৰ হস্ততাঁত পৰম্পৰাৰ সংৰক্ষণতো যথেষ্ট সহায় কৰিব।”উক্ত অনুষ্ঠানত মুখ্যমন্ত্ৰীৰ উপৰি মন্ত্ৰী ইউ জি ব্ৰহ্ম, নন্দিতা গাৰ্লোছা, অজন্তা নেওগ, পৰিমল শুক্লবৈদ্য, অতুল বৰা, যোগেন মোহন, সঞ্জয় কিষাণ, সাংসদ কুইন ওজা আৰু বহুকেইগৰাকী গণ্য-মান্য ব্যক্তি উপস্থিত থাকে।
