বাছ এখন চলাই গৈ থাকোঁতেই হৃদৰোগত আক্ৰান্ত হয় চালকজন। ফলত ষ্টিয়াৰিঙৰ ওপৰত তেওঁ ঢলি পৰে। ইয়াৰ পিছতে নিয়ন্ত্ৰণহীন বাছখনে চিগনেলত থিয় হৈ থকা গাড়ীত ধাৰাবাহিকভাৱে খুন্দা মাৰে।
তাৰ ফলত এজন পথচাৰীৰ মৃত্যু হয়। বহু আহত হয়। আহত আটাইকেইজন চিকিৎসালয়ত চিকিৎসাধীন হৈ আছে। পিছত বাছখনৰ পৰা উদ্ধাৰ হয় চালকজনৰ মৃতদেহ। চিকিৎসকে জনোৱা মতে, চালক হৰদেৱ পাল (৬০)ৰ হাৰ্ট এটেকত মৃত্যু হয়। মধ্যপ্ৰদেশৰ জবলপুৰত সংঘটিত হৈছে এই ঘটনা।
পোহৰলৈ আহিছে জবলপুৰ চহৰৰ ট্ৰেফিক চিগনেলৰ চিচিটিভি ফুটেজ। তাত দেখা গৈছে, কেইবাখনো মটৰচাইকেল আৰু ৰিক্সা চিগনেলত থিয় হৈ আছে। হঠাৎ পিছফালৰ পৰা এখন বাছে নিয়ন্ত্ৰণ হেৰুৱাই খুন্দা মাৰে।
পিছত বাছখনো বাগৰি পৰে। আৰক্ষীৰ মতে, বাছখন চলাই আছিল হৰদেৱ নামৰ এজন চালকে। যোৱা দহ বছৰ ধৰি মহানগৰীত ‘মেট্ৰো বাছ’ চলাই আহিছে। বাছ চলাওঁতে হঠাতে তেওঁৰ হাৰ্ট এটেক হয়। লগে লগে তেওঁ ষ্টিয়াৰিঙৰ ওপৰতে ঢলি পৰে।
আৰক্ষীৰ সূত্ৰ অনুসৰি, বাছখনৰ যাত্ৰী আৰু দুটা শিশুসহ মুঠ ৬জন লোক গুৰুতৰভাৱে আহত হয়। নিয়ন্ত্ৰণ হেৰুৱাই বাছখনে খুন্দা মাৰে এজন বৃদ্ধক। তেওঁক চিকিৎসালয়লৈ লৈ যোৱা হয়। পিছত তাতেই তেওঁৰ মৃত্যু হয়। অৱশ্যে বাছখনৰ গতি কম হোৱাৰ বাবে বৃহৎ দুৰ্ঘটনা এৰাই চলিব পৰা বুলি দাবী কৰিছে আৰক্ষীয়ে।
