চীন অধিকৃত তিব্বতৰ পৰা অৰুণাচললৈ বৈ যোৱা ছিয়াং নদীৰ স্বচ্ছ পানী হঠাতে ঘোলা হৈ পৰিছে। পানীৰ লগত মিহলি হৈছে বিপুল পৰিমাণৰ বোকা। আৰু তাৰ বাবেই অৰুণাচল আৰু অসমত আবতৰীয়া বানৰ আশংকা বাঢ়িছে।চৰকাৰী সূত্ৰ অনুসৰি, চীনে সীমান্তৰ সিপাৰে নদীখনত কিছু বৃহৎ নিৰ্মাণকাৰ্য আৰম্ভ কৰিছে।
আৰু সেইবাবেই এই অৱস্থা। প্ৰশাসনৰ সূত্ৰ অনুসৰি, অৰুণাচল প্ৰদেশৰ আপাৰ ছিয়াং আৰু পূব ছিয়াং জিলাৰ মাজত বৈ যোৱা ছিয়াং নদীৰ জলপৃষ্ঠই নহয় বিগত কিছুদিনত যথেষ্ট হ্ৰাস পাইছে। নদীখন অৱৰোধ কৰা নিৰ্মাণকাৰ্যৰ বাবেই এনে হʼব পাৰে বুলি ধাৰণা কৰা হৈছে।
ভূমিস্খলনৰ ফলত জমা হোৱা পানী হঠাতে তললৈ নামিলে অৰুণাচলৰ টুটিং, ইনকিয়ং আৰু পাছিঘাটৰ দৰে চহৰ বিপদত পৰিব পাৰে। পূব ছিয়াঙৰ জিলা দণ্ডাধীশ টাই টাগুৱে কয়, “ছিয়াং নদীত হঠাতে বোকা বাঢ়িছে। নদীৰ ওপৰফালে কʼৰবাত বৃহৎ পৰিসৰৰ মাটি কটাৰ অভিযান হʼলে এনে হʼব পাৰে। পৰিস্থিতিৰ বুজ লʼবলৈ আমি নদী বিশেষজ্ঞৰ সৈতে আলোচনাত মিলিত হৈ আছো।
পৰিস্থিতি সযতনে নিৰীক্ষণ কৰা হৈছে।”তিব্বতৰ য়াৰলুং ছাংপো নদী ছিয়াং নামেৰে অৰুণাচল প্ৰদেশলৈ বৈ যায়। ছিয়াঙে আৰু তললৈ নামি আহি অসমত ব্ৰহ্মপুত্ৰ নাম লয়। ভাৰতৰ আপত্তি অতিক্ৰম কৰি সেই নদীত চীনৰ নিৰ্মাণ ২০১৫ চনৰ পৰা পৰ্যায়ক্ৰমে চলি আছে। ফলত ক্ৰমান্বয়ে পানীৰ স্তৰ কমি আহিছে। চীনৰ বান্ধৰ বাবেই অদূৰ ভৱিষ্যতে অসম আৰু অৰুণাচলকে ধৰি উত্তৰ-পূবৰ ৰাজ্যসমূহত পানীৰ সংকট হʼব পাৰে বুলি একাংশ পৰিৱেশবিদৰ মত।
