মুছলমান ৰাষ্ট্ৰ আজাৰবাইজানে তুৰস্ক আৰু পাকিস্তানৰ পৰা লাভ কৰে সামৰিক সাহায্য। সীমান্ত সংঘাতৰ প্ৰাৰম্ভিক পৰ্যায়ত তেওঁলোক ‘সুবিধাজনক পৰিস্থিতিʼত উপনীত হোৱা বুলি পশ্চিমীয়া সংবাদ মাধ্যমৰ দাবী। এইবাৰ আজাৰবাইজানৰ সৈতে মুখামুখী হʼবলৈ নতুন দিল্লীৰ কাষ চাপিছিল খ্ৰীষ্টান প্ৰধান আৰ্মেনিয়াই।
দেশখনৰ বৈদেশিক কাৰ্যালয়ৰ এক বিবৃতিত কোৱা হৈছে, “আমি ভাৰতৰ বৈদেশিক মন্ত্ৰী জয়শংকৰক জনাইছো যে আৰ্মেনিয়াৰ সাৰ্বভৌমত্বক আক্ৰমণ কৰাৰ চেষ্টা চলি আছে।”
২০২০ চনত নাগৰ্নো কাৰাবাখ অঞ্চল দখলৰ বাবে দুয়োখন দেশৰ মাজত হোৱা যুদ্ধত প্ৰায় ছয় হাজাৰৰো অধিক লোক নিহত হৈছিল। সেই সময়ত এই সংঘাতৰ মধ্যস্থতা কৰিছিল মস্কোৱে। কিন্তু এইবাৰ ইউক্ৰেইন সমস্যাত ব্যস্ত হোৱাৰ বাবে ভ্লাদিমিৰ পুটিনৰ বাবে সেই ভূমিকা লোৱাটো সম্ভৱ নহয় বুলি একাংশ কূটনৈতিক বিশেষজ্ঞই ভাবে। দেশীয় প্ৰযুক্তিৰে নিৰ্মিত পিনাকাই কাৰ্গিল যুদ্ধত ভাৰতৰ বিজয়ত গুৰুত্বপূৰ্ণ ভূমিকা পালন কৰিছিল।
৯০ কিলোমিটাৰ দূৰত্বৰ এই ট্ৰাক-বাহী ক্ষেপণাস্ত্ৰটো শেহতীয়াকৈ ভাৰতীয় সেনাই লাডাখৰ প্ৰকৃত নিয়ন্ত্ৰণ ৰেখাৰে (এলএচি) সম্ভাৱ্য চীনৰ আক্ৰমণ প্ৰতিহত কৰিবলৈ মোতায়েন কৰিছিল। মাত্ৰ ৪৪ ছেকেণ্ডত একেলগে ৭২টা মিছাইল নিক্ষেপ কৰিবলৈ সক্ষম হৈছে ডি আৰ ডি অʼৰ ‘মাল্টিপল ৰকেট লঞ্চাৰ’। একাংশ সামৰিক পৰ্যবেক্ষকৰ মতে এই ভাৰতীয় ক্ষেপণাস্ত্ৰ আজাৰবাইজানৰ আক্ৰমণ ৰোধ কৰাৰ বাবে আৰ্মেনিয়ান সেনাৰ এক গুৰুত্বপূৰ্ণ আহিলা হʼব পাৰে।
