শিলচৰৰ পূৰ্ণচন্দ্ৰ পাল ৰোডত সামান্য বানপানীৰ ফলত কৃত্ৰিম বানপানীৰ সৃষ্টি হয়। ৰাতিপুৱা ঘৰুৱা পানীৰ মটৰ চলাবলৈ গৈ তাত বিদ্যুৎস্পৃষ্ট হৈ মৃত্যু হয় জয়দীপ চক্ৰৱৰ্তী ওৰফে মুন্না। এই অঞ্চলত হোৱা এই ঘটনাৰ বাবে স্থানীয় ৰাইজে জিলা প্ৰশাসন, পৌৰসভা আৰু জনপ্ৰতিনিধি দায়ী কৰি দুপৰীয়া তিনি ঘণ্টা ধৰি অম্বিকাপট্টি পইণ্টত মৃতদেহ লৈ প্ৰতিবাদ সাব্যস্ত কৰে আৰু ভয়ংকৰ যান-যঁটৰ সমস্যা হয়।
আৰক্ষী আৰু চি আৰ পি এফ বাহিনীয়ে পৰিস্থিতি নিয়ন্ত্ৰণৰ চেষ্টা চলায়।নল-নৰ্দমা মেৰামতিৰ বাবে স্থানীয় ৰাইজে বিগত বহু দিন ধৰি আবেদন কৰিছিল যদিও মেৰামতি নহ’ল আৰু জমা হোৱা পানীত শ্বৰ্ট চাৰ্কিট হোৱাৰ ফলত উক্ত ব্যক্তিগৰাকীৰ মৃত্যু হয়।
প্ৰতিবাদকাৰী ৰাইজে মৃতকৰ পৰিয়ালক পৰ্যাপ্ত আৰ্থিক ক্ষতিপূৰণ দিয়াৰ লগতে নিকটৱৰ্তী অঞ্চলৰ নলা-নৰ্দমা পৰিষ্কাৰ কৰাৰ দাবী জনায় যাতে পুনৰ এনে দুৰ্ঘটনা সংঘটিত নহয়। উল্লেখ্য যে, মৃত যুৱকজনৰ নাম জয়দীপ চক্ৰৱৰ্তী (মুন্না), বয়স ৩০ বছৰ। তেওঁ এখন ষ্ট’ৰত মেনেজাৰ হিচাপে কাম কৰিছিল আৰু পৰিয়ালৰ সূত্ৰই জনোৱা মতে, মাত্ৰ পাঁচ মাহৰ আগতে তেওঁৰ বিয়া হৈছিল। তেওঁৰ পত্নী সন্তান সম্ভৱা আছিল ।
মুন্না আজি ৰাতিপুৱা সাৰ পাই পানীৰ মটৰ চুইচ অন কৰিবলৈ গৈছিল। যোৱা নিশাৰ বৰষুণত মটৰটো থকা ঠাই পানীৰে ভৰি পৰিছিল। হঠাতে পৰিয়ালৰ লোকে এটা শব্দ শুনিবলৈ পাই লৰালৰিকৈ আহি জয়দীপ চক্ৰৱৰ্তীক মাটিত অচেতন হৈ পৰি থকা দেখে। অচেতন হৈ থকা জয়দীপক প্ৰথমে শিলচৰ অসামৰিক চিকিৎসালয়লৈ লৈ যোৱা হয়। তাৰ পৰা তেওঁক শিলচৰ মেডিকেল কলেজ হাস্পতাললৈ লৈ যোৱা হয় আৰু চিকিৎসকে মৃত বুলি জানিবলৈ দিয়ে।
