দিল্লীৰ আবকাৰী নীতিত অনিয়ম সংঘটিত হোৱাৰ অভিযোগত শুকুৰবাৰে পুৱা দিল্লীৰ উপমুখ্যমন্ত্ৰী মনীষ ছিছʼদিয়াৰ ঘৰত অভিযান চলায় চিবিআয়ে। এইবাৰ আম আদমী পাৰ্টিৰ ৰাজ্যসভাৰ সাংসদ ৰাঘৱ চাড্ডাই এই প্ৰসংগত আগতীয়াকৈ জনাইছে যে কেন্দ্ৰীয় তদন্তকাৰী দলৰ সদস্যসকলে ছিছʼদিয়াৰ ঘৰৰ পৰা কি বিচাৰি পাব পাৰে।
চাড্ডাৰ দাবী, দলৰ সতীৰ্থৰ ঘৰৰ পৰা পেঞ্চিল আৰু জ্যামিতিৰ বাকচৰ বাহিৰে একো পোৱা নাযায়!শুকুৰবাৰে আমেৰিকাৰ আগশাৰীৰ বাতৰিকাকত নিউয়ৰ্ক টাইমছে দিল্লীৰ শিক্ষা আৰ্হিক প্ৰশংসা কৰিছে। দিল্লী শিক্ষা বিভাগৰ দায়িত্বত আছে ছিছʼদিয়া। ইতিমধ্যে দিল্লীৰ মুখ্যমন্ত্ৰী অৰবিন্দ কেজৰিৱালে চিছʼদিয়াৰ ঘৰত চিবিআইৰ অভিযানক সমালোচনা কৰিছে। ৰাঘৱ চাড্ডাই এই মন্তব্য কৰে।
চাড্ডাই মন্তব্য কৰি কয় যে আম আদমী পাৰ্টিৰ সফলতাক ভয় কৰি নৰেন্দ্ৰ মোদী আৰু বিজেপিয়ে প্ৰতিশোধৰ ৰাজনীতি চলাই আছে। ৰাজ্যসভাৰ এইগৰাকী সাংসদে দাবী কৰে যে আম আদমী পাৰ্টীৰ বহু নেতাৰ ঘৰত তালাচী চলালেও একো পোৱা নগʼল।
ৰাজনৈতিক শিবিৰৰ একাংশৰ অনুমান, ছিছʼডিয়াৰ শিক্ষাপ্ৰীতী আৰু পাণ্ডিত্যৰ কথা বুজিয়েই চাড্ডাই পেঞ্চিল আৰু জ্যামিতি বাকচৰ প্ৰসংগ উত্থাপন কৰিছে। লগতে চাড্ডাই দাবী কৰে যে কেজৰিৱালৰ ঘৰত তালাচী অভিযানত বহুত মাফলাৰ উন্মোচিত হʼব। দিল্লীৰ মুখ্যমন্ত্ৰীগৰাকীয়ে প্ৰায়ে ডিঙিত মাফলাৰ পিন্ধি থকা দেখিবলৈ পোৱা যায়। চাড্ডাই হয়তো সেই কথাৰ ইংগিত কৰিব বিচাৰিছে।
