ক্ৰ’পী ন্যাস বঁটা ডিফুৰ দুই কৃতী ছাত্ৰী আশিকা দাস আৰু মেলিম ছিংনাৰপীলৈ

ASSAM TIMES POST, ডিফুঃ ২০১৮ বৰ্ষৰ বাবে ডিফু লেখিকা সমাৰোহ সমিতিৰ উদ্যোগত আজি ৰশ্মি ক্ৰ’পী সোঁৱৰণি ন্যাস বঁটা ডিফুৰ দুই কৃতী ছাত্ৰী আশিকা দাস আৰু মেলিম ছিংনাৰপীক প্ৰদান কৰা হয়৷ আজি বিয়লি ডিফু লেখিকা সমাৰোহ সমিতিৰ কাৰ্যালয়ত অনুষ্ঠিত এক গাম্ভীৰ্যপূৰ্ণ অনুষ্ঠানত ছাত্ৰী দুগৰাকীলৈ এই বঁটা প্ৰদান কৰা হয়৷ ২০০১ চনত ডিফুৰ এক সম্ভ্ৰান্ত পৰিয়ালৰ কন্যা ৰশ্মি ক্ৰ’পী নামৰ মেধাবী ছাত্ৰীগৰাকী নিয়তিৰ লগত হাৰ মানি দুৰাৰোগ্য কৰ্কট ৰোগত অকালত কৰুণ মৃত্যুক সাৱটি লবলগীয়া হৈছিল৷ তেতিয়াৰ পৰাই সেই সময়ৰ স্বাস্থ্য বিভাগৰ সঞ্চালক বিভাগত অধিষ্ঠিত পিতৃ ডাঃ বদন চন্দ্ৰ ক্ৰ’ আৰু শিক্ষয়িত্ৰী মাতৃ গীতাঞ্জলী দাস ক্ৰ’ই ৰশ্মি ক্ৰ’পী সোঁৱৰণি ন্যাসৰ জৰিয়তে হাইস্কুল শিক্ষান্ত পৰীক্ষাত ডিফুৰ কেন্দ্ৰ সমূহৰ ভিতৰত প্ৰথম স্থানপ্ৰাপ্ত অজনজাতীয় ছাত্ৰ-ছাত্ৰী আৰু আৰু এগৰাকী জনজাতি ছাত্ৰ-ছাত্ৰীক এক বঁটা প্ৰদান কৰাৰ ব্যৱস্থা গ্ৰহণ কৰে৷ উক্ত বঁটা প্ৰতি বছৰে প্ৰদান কৰিবলৈ ডিফু লেখিকা সমাৰোহক দায়িত্ব অৰ্পণ কৰে৷ ডিফু লেখিকা সমাৰোহ সমিতিয়েও ২০০১ চনৰ পৰা এই দায়িত্ব সুচাৰুৰূপে পালন কৰি আহিছে৷ এইবাৰ উক্ত বঁটাৰ বাবে ২০১৮ বৰ্ষত ডিফু ডনবস্ক’ হাইস্কুলৰ পৰা কৃতিত্ব সহকাৰে উত্তীৰ্ণ হোৱা আশিকা দাস (৯৫ শতাংশ) আৰু মেলিম ছিংনাৰপী ,(৮৯ শতাংশ)ক বাচনি কৰা হৈছে ৷ আশিকা দাস ডিফুৰ জঘ্নেশ্বৰ দাস আৰু গঙ্গা দাসৰ কন্যা আৰু মেলিম ছিংনাৰপী সাংবাদিক কাংবুৰা ছিংনাৰ আৰু পাটৰপী টেৰণপীৰ কন্যা ৷ আশিকা দাসৰ পিতৃ বিয়োগৰ বাবে অনুষ্ঠানত উপস্থিত থাকিব নোৱাৰাত তেওঁৰ হৈ পৰিয়ালৰ সদস্য আৰু মেলিম ছিংনাৰপী নিজে এই বঁটা গ্ৰহণ কৰে৷ বঁটাটোত আছিল নগদ ৫০০১ টকা, এখন ফুলাম গামোছা, কিতাপৰ টোপোলা, কলম আৰু এখনকৈ মানপত্ৰ৷ ডিফু লেখিকা সমাৰোহ সমিতিৰ সভানেত্ৰী ৰীণা দেৱীৰ পৌৰোহিত্যত অনুষ্ঠিত সভাখনত বিশিষ্ট অতিথি আৰু সন্মানীয় অতিথি হিচাপে উপস্থিত থাকে ক্ৰমে, অসম বিশ্ববিদ্যালয় ডিফু চৌহদৰ বাণিজ্য বিভাগৰ প্ৰৱক্তা ড° ৰতন বৰ্মণ বিশিষ্ট লেখিকা গীতা বৰা, কাৰবি অাংলং জিলা লেখিকা সমীৰোহ সমিতিৰ সভানেত্ৰী সাবিত্ৰী গগৈ দাতা গীতাঞ্জলী দাস ক্ৰ’ আৰু গণ্য মাণ্য ব্যক্তিসকল৷ অনুষ্ঠানৰ পূৰ্বেই ডিফু লেখিকা সমাৰোহ সমিতিৰ সদস্যা সকলৰ সুললিত কণ্ঠত পৰিবেশন কৰা এটি সমবেত সংগীতেৰে আৰম্ভ হোৱা অনুষ্ঠান প্ৰয়াত ৰশ্মি ক্ৰ’পীৰ প্ৰাতিকৃতিত পুষ্পাঞ্জলী আৰু শ্ৰদ্ধাৰ্ঘ নিবেদন কৰা হয়৷ ইয়াৰ পিছত বিশিষ্ট বক্তা সকলে বৰ্তমান যুগৰ শিক্ষা ব্যৱস্থা আৰু শিক্ষা আহৰণৰ বিভিন্ন দিশ সমূহৰ ওপৰত চমু আলোকপাত কৰে৷