বোকাজান মহকুমাৰ মহকুমা আৰক্ষী বিষয়া জন দাস আৰু খটখটি আৰক্ষী থানাৰ ভাৰপ্ৰাপ্ত আৰক্ষী বিষয়া ৰাজু দুৱৰাৰ এক গোপন খবৰৰ ভিত্তিত আজি বিয়লি অসম-নগালেণ্ডৰ লাহৰিজানৰ টিলাবস্তিৰ পৰা অবৈধ মাৰণাস্ত্ৰসহ দুই যুৱকক আটক কৰিবলৈ সক্ষম হয়।
আজি আৰক্ষীৰ জালত পৰা এই যুৱক দুজন হৈছে ক্ৰমে কাছাৰৰ কাবিল উদ্দিন লস্কৰ আৰু আনজন হৈছে দৰঙৰ মাণিক আলি। ধৃত যুৱক দুজনৰ পৰা আৰক্ষীয়ে এটা থ্ৰী নত থ্ৰী ৰাইফল; এটা ডিবিবিএল ৰাইফল; এটা স্কোপ; .৩০৩ ৰ ৩৪ জাই, সক্ৰিয় গুলী; .২২ ৰ ৭ জাই সক্ৰিয় গুলি; ৪৭ জাই বিভিন্ন বন্দুকৰ গুলী উদ্ধাৰ কৰিবলৈ সক্ষম হয়।
আৰক্ষী সূত্ৰে জানিব পৰা মতে যুৱক দুজনে নগালেণ্ডৰ ডিমাপুৰৰ পৰা কোনো লোকক বিক্ৰীৰ বাবে এই মাৰণাস্ত্ৰ দুটা লৈ আহিছিল।আনহাতে এই যুৱক দুজনে অসম-নাগালেণ্ডৰ লাহৰিজানত ভাৰাতিয়া হিচাপে আছিল বুলিও আৰক্ষীয়ে জানিবলৈ দিছে।ইতিমধ্যে আৰক্ষীয়ে অধিক তথ্যৰ বাবে ধৃত যুৱক দুজনক জেৰা অব্যাহত ৰাখিছে।
