কিছু দিন পূৰ্বে শ্বাহৰুখ খানৰ পুত্র আৰিয়ান খানৰ নাম জড়িত হৈ পৰিছিল ড্ৰাগছ-কাণ্ডত। সম্প্রতি ড্ৰাগছ গোচৰত আৰিয়ান দোষমুক্ত হৈছে। এইবাৰ একেই অভিযোগত বলিউড অভিনেতা শক্তি কাপুৰৰ পুত্ৰ তথা অভিনেত্রী শ্রদ্ধা কাপুৰৰ ভাতৃ সিদ্ধান্ত কাপুৰক গ্ৰেপ্তাৰ আৰক্ষীৰ। কর্নাটকৰ বেঙ্গালুৰুত এটি ৰেভ পার্টিত আৰক্ষীয়ে অভিযান চলাওঁতে গ্ৰেপ্তাৰ হয় সিদ্ধান্ত। তেওঁৰ সৈতে উক্ত পার্টিৰ পৰা আৰু ছজনক গ্ৰেপ্তাৰ কৰা বুলি জনাইছে বেঙ্গালুৰু আৰক্ষীয়ে।
দেওবাৰে নিশা বেঙ্গালুৰুৰ এখন বিখ্যাত হোটেলৰ পাবত উক্ত ৰেভ পার্টি চলিছিল। বেঙ্গালুৰু আৰক্ষীয়ে জনোৱা মতে, সিদ্ধান্ত তাত আমন্ত্রিত আছিল ডিজে হিচাবে। কিন্তু তেৱোঁ পার্টি চলি থাকোঁতে ড্ৰাগছ লোৱা বুলি আৰক্ষী সূত্রে জনোৱা হৈছে। পিছত সিদ্ধান্তক গ্ৰেপ্তাৰ কৰি ড্ৰাগছৰ পৰীক্ষা কৰাত হলেও ৰিপোর্ট পজিটিভ আহে।
