ASSAM TIMES POST
নগাঁওঃ প্ৰদেশ কংগ্ৰেছৰ পৰা নিলম্বিত নেতা অনিল ৰাজাই প্ৰাক্তন মন্ত্ৰী ৰকিবুল হুছেইনৰ বিৰুদ্ধে কেতবোৰ বিস্ফোৰক অভিযোগ তুলি প্ৰাক্তন মন্ত্ৰী গৰাকীৰ বিভিন্ন স্থানত নামে বেনামে অগাধ সম্পত্তিৰ থকাৰ লগতে শিক্ষাৰ্গত প্ৰমাণ পত্ৰক লৈও গুৰুতৰ অভিযোগ তুলিছিল।
পৰৱৰ্তী সময়ত দুয়োগৰাকী ৰাজনৈতিক নেতাৰ বাকযুদ্ধ এনে পৰ্যায় পাইছিল গৈ যে এই অভিযোগৰ সত্যতাক ৰকিবুল হুছেইনে প্ৰমাণ কৰিব নোৱাৰিলে অনিল ৰাজাই ৰাজনৈতিক জীৱনৰ পৰা সন্ন্যাস লোৱাৰ কথাও সদম্ভে ঘোষণা কৰিছিল। ইয়াৰ পাছতে প্ৰাক্তন মন্ত্ৰী হুছেইনে অনিল ৰাজাৰ বিৰুদ্ধে নগাঁও আদালতত এক গোচৰ ৰজু কৰিছিল। কিন্তু অনিল ৰাজাই বাৰম্বাৰ আদালতত বিভিন্ন অজুহাত দেখুৱাই হাজিৰ হোৱাৰ পৰা বিৰত আছে।
এসময়ত সংবাদ মাধ্যমৰ শিৰোনামা দখল কৰা অনিল ৰাজাই বিগত সময়ত নগাঁও আদালতৰ কেবাটাও তাৰিখত হাজিৰ নোহোৱাৰ বাবে এতিয়া উভতি ধৰিলে প্ৰাক্তন মন্ত্ৰী হুছেইনে। আজি গোচৰটো সন্দৰ্ভত নগাঁও আদালতত উপস্থিতত হৈ সংবাদ মাধ্যমৰ আগত ৰকিবুল হুছেইনে কয় যে অনিল ৰাজাই সস্তীয়া জনপ্ৰিয়তা অৰ্জনৰ লগতে ৰাজনৈতিক উদ্দেশ্য সিদ্ধি আৰু ব্যক্তিগত লাভালাভৰ বাবেহে মোৰ বিৰুদ্ধে ভিত্তিহীন ভাবে অভিযোগ তুলিছিল ।
ইপিনে, অনিল ৰাজাৰ অধিবক্তা গৰাকীয়ে অনিল ৰাজাই নিৰাপত্তাৰ অভাৱত ভূগিছে বুলি সংবাদ মাধ্যমৰ আগত সদৰী কৰিছে।
