যোৱা এটা সপ্তাহতকৈ অধিক কাল ধৰি ডিমা হাছাও জিলাত অব্যাহত থকা ধাৰাবাহিক বৃষ্টিপাতৰ ফলত জিলাখনত সংঘটিত হোৱা ভয়ংকৰ ধ্বংসলীলাৰ পিছত আজি প্ৰকৃতি সামান্য শান্ত হোৱা পৰিলক্ষিত হৈছে যদিও ডিমা হাচাও জিলাৰ আকাশ এতিয়া মেঘাচন্ন হৈ ৰোৱাত মুঠেই আশংকামুক্ত হোৱা নাই স্থানীয় জিলাবাসী। ফলস্বৰূপে চাৰিওফালৰ পৰা যোগাযোগ বিচ্ছিন্নহৈ ভীষণ খাদ্য সংকটৰ দিশে গতি কৰাৰ লগতে এক প্ৰকাৰ বিচ্ছিন্ন দ্বীপলৈ ৰূপান্তৰ হৈছে ডিমা হাছাও ৷ কালি নিশাৰ ভাগতো জিলাখনৰ সদৰ চহৰ হাফলঙত বৃষ্টিপাত হোৱাৰ লগতে আজি পুৱা পৰ্যন্ত জিলাখনত বৰষুণ অব্যাহত থকাৰ বাতৰি পোৱা গৈছে। ইফালে, শেহতীয়াকৈ ধ্বংসলীলাৰ ফলত ডিমা হাচাও জিলাৰ সদৰ চহৰ সম্পূৰ্ণৰূপে এক বিচ্ছিন্ন দ্বীপত পৰিণত হৈছে। সদৰ চহৰ হাফলঙত বিগত কেইবাদিন ধৰি বিদ্যুৎ সেৱা ব্যাহত হৈ থকাৰ লগতে মোবাইল পৰিসেৱা বন্ধ হৈ পৰাৰ ফলত চহৰখনৰসৈতে যোগাযোগ কৰাৰ সকলো পথেই একপ্ৰকাৰ বন্ধ হোৱাৰ দৰে পৰিস্থিতিৰ সৃষ্টি হৈছে।
শেহতীয়াকৈ জিলাখনৰ কালাচন্দত থকা এখন পকী দলঙৰ দুয়োটি পাৰ বহি যোৱাৰ উপক্ৰম হোৱা বুলি বাতৰি পোৱা গৈছে। ইয়াৰ মাজতে অসম চৰকাৰৰ পাৰ্বত্য এলেকা উন্নয়ন দপ্তৰৰ মন্ত্ৰী যোগেন মহনে জিলাখনৰ মাইবঙত উপস্থিত হৈ জিলাখনৰ দূৰ্যোগপূৰ্ণ পৰিস্থিতিৰ বুজ লয়। আনহাতে, অসম বিধানসভাৰ উপাধ্যক্ষ ডাঃ নোমল মমিনেও আজি ডিমা হাচাও জিলাৰ লাংটিঙত উপস্থিত হৈ জিলাখনৰ দূৰ্যোগপূৰ্ণ পৰিস্থিতিৰ বুজ লয়। লাংটিঙত উপস্থিত হৈ উপাধ্যক্ষগৰাকীয়ে শেহতীয়া দূৰ্যোগৰ ফলত জিলাখনত হোৱা ক্ষয়-ক্ষতিৰ বুজ লয়। ইয়াৰ পিছতে লাংটিঙত থকা অস্থায়ী আশ্ৰয় শিবিৰত উপস্থিত হৈ আশ্ৰয় শিবিৰত থকা লোকসকলৰ অৱস্থাৰ বুজ লয়। উল্লেখযোগ্য যে, লাংটিঙৰ অস্থায়ী আশ্ৰয় শিবিৰত এতিয়া কমেও প্ৰায় দুশ পৰিয়ালৰ আঠ শতাধিক লোকে আশ্ৰয় গ্ৰহণ কৰি আছে। উপাধ্যক্ষগৰাকীয়ে আশ্ৰয় শিবিৰত থকা লোকসকলৰ সুবিধা-আসুবিধাৰ বুজ লয়।
উপাধ্যক্ষগৰাকীয়ে লগতে ডিমা হাচাও জিলাৰ উপায়ুক্তৰ সৈতে টেলিফোনযোগে বাৰ্তালাপ কৰি জিলাখনৰ সাম্প্ৰতিক পৰিস্থিতিৰ বুজ লোৱাৰ লগতে আশ্ৰয় শিবিৰসমূত প্ৰয়োজনীয় খাদ্য সামগ্ৰীৰ যোগান ধৰাৰ বাবে নিৰ্দেশ প্ৰদান কৰে। উপাধ্যক্ষগৰাকীৰ সৈতে আজি এই ভ্ৰমণত স্থানীয় এমএচি গলঞ্জয় থাউচেন উপস্থিত থাকে। লক্ষণীয় যে, জিলাখনত শেহতীয়াকৈ সৃষ্টি হোৱা বানে ভয়ংকৰ প্ৰলয়ৰ পিছত ইয়াক পুনৰ পূৰ্বৰ অৱস্থালৈ ঘুৰাই অনাটো উত্তৰ কাছাৰ পাৰ্বত্য স্বায়ত্বশাসিত পৰিষদৰ কতৃপক্ষৰ বাবেও এক বৃহৎ প্ৰত্যাহ্বান হিচাপে পৰিগণিত হৈছে। প্ৰলয়ৰ অন্তত জিলাখনক পুনৰ গঢ়ি তোলাৰ বাবে প্ৰয়োজনীয় পুঁজিৰ বাবে পৰিষদৰ মুখ্য কাৰ্যবাহী সদস্য দেৱলাল গোৰ্লোছা’ই ৰাইজৰ সহায়ৰ বাবে আহ্বান জনাইছে। এলেকাটোৰ ৰাইজৰ সহায়ৰ বাবে এক্সিছ বেংকৰ ৯১৯০১০০৪৭৬০১২৮৬ (আইএফএছচি-ইউটিআইবি ০০০৩০৯৬) নম্বৰৰত দান বৰঙণি আগবঢ়োৱাৰ বাবে সামাজিক মাধ্যমযোগে সকলোকে আহ্বান জনাইছে।
