ৰাষ্ট্ৰীয় স্বয়ংসেৱক সংঘৰ (RSS) মুৰব্বী মোহন ভাগৱতে (Mohan Bhagawat) ভাৰতত অশুভ শক্তিয়ে শাসন ব্যৱস্থাৰ পৰিৱৰ্তন আনিবলৈ চেষ্টা চলাইছে বুলি অভিযোগ উত্থাপন কৰিছে। অৱশ্যে এই প্ৰচেষ্টা সফল নহ’ব বুলিও তেওঁ দাবী কৰিছে। ভাগৱতে কয়, “এনেকুৱা (শাসন ব্যৱস্থা পৰিৱৰ্তন) আগতে হোৱা নাই। ভৱিষ্যতেও নহ’ব।”
মহাৰাষ্ট্ৰৰ নাগপুৰত আৰএছএছৰ বিজয়াদশমী উদযাপন উপলক্ষে দিয়া ভাষণত আৰএছএছৰ মুৰব্বীগৰাকীয়ে অভিযোগ কৰে যে অশুভ শক্তিসমূহে ভাৰতৰ অগ্ৰগতি ৰোধ কৰিব নোৱাৰি দেশ ভাঙিবলৈ চেষ্টা কৰিছে। ভাগৱতে কয়, “ভাৰত তেওঁলোকৰ লক্ষ্য। কাৰণ ভাৰত প্ৰগতিৰ পথত আগবাঢ়িছে। এই সকলো অশুভ শক্তিয়ে জানে যে যোৱা কেইটামান দশক ধৰি ভাৰতে যিদৰে গুৰুত্বপূৰ্ণ নীতিৰে আগবাঢ়ি আহিছে, সেইদৰে এই প্ৰগতি বিঘ্নিত কৰিব নোৱাৰিব। সেইবাবেই তেওঁলোকে ভাৰত আৰু সংঘক ভাঙি পেলাবলৈ চেষ্টা কৰিছে।”
ভাৰতত অস্থিৰতা সৃষ্টি কৰিবলৈ চেষ্টা কৰাৰ অভিযোগ উত্থাপন কৰি ভাগৱতে আন দেশৰ উদাহৰণো উল্লেখ কৰে। তেওঁ দাবী কৰে যে বিশ্বৰ বহু শক্তিয়ে ভাৰতৰ পৰাজয় বিচাৰে। অৱশ্যে তেওঁ বিশেষভাৱে কাৰো নাম উল্লেখ কৰা নাই। শেহতীয়াকৈ ফ্ৰান্স, নেপাল আৰু বাংলাদেশত চৰকাৰৰ বিৰুদ্ধে ৰাজহুৱা প্ৰতিবাদৰ উদ্ধৃতি দি আৰএছএছৰ মুৰব্বীগৰাকীয়ে কয়, “পশ্চিমৰ পৰা এজাক ধুমুহা আহি আছে, যিয়ে সংস্কৃতি, পৰম্পৰাগত ব্যৱস্থা আৰু নিৰাপত্তাক ঘৃণা কৰে। এই ধুমুহাই ধ্বংস বিচাৰে।” ভাগৱতে দাবী কৰে যে বিশ্বৰ বিভিন্ন দেশত একাংশ লোকে নিজৰ স্বাৰ্থ পূৰণৰ বাবে এনে ‘অৰাজকতা’ সৃষ্টি কৰিছে।
ভাগৱতে লগতে কয় যে আসুৰিক শক্তিয়ে ভাৰত, হিন্দু আৰু সংঘক ধ্বংস কৰাৰ পৰিকল্পনা কৰিছে। সেই অনুসৰি কাম কৰি আছে। সংঘৰ মুৰব্বীগৰাকীয়ে লগতে দাবী কৰে যে ক্ষমতা দখল কৰাৰ ইচ্ছা আৰু জ্ঞানৰ অভাৱত দুই-এজন অভিলাষী নেতা ইয়াৰ লগত জড়িত হৈ আছে। অৱশ্যে গণতন্ত্ৰত আন্দোলনৰ প্ৰয়োজনীয়তাও ভাগৱতে স্বীকাৰ কৰে। তেওঁ কয়, “সমস্যা হ’লে নিশ্চয় আন্দোলন হ’ব। গণতন্ত্ৰত আন্দোলন হ’ব। কিন্তু ইয়াৰ জৰিয়তে সমাধান বিচাৰিব লাগে। আন্দোলনৰ লক্ষ্য সমাধান বিচাৰি উলিওৱা।”
বিগত কিছুদিন ধৰি দিল্লীকে ধৰি দেশৰ বিভিন্ন প্ৰান্তত এছআইআৰ প্ৰক্ৰিয়াত অনিয়মৰ অভিযোগ উত্থাপন কৰি দেশৰ মুখ্য নিৰ্বাচন আয়ুক্ত জ্ঞানেশ কুমাৰক অপসাৰণৰ দাবীত প্ৰতিবাদ অব্যাহত আছে। এফালে কংগ্ৰেছৰ নেতৃত্বত বিৰোধী মিত্ৰজোঁট ‘ইণ্ডিয়া’ৰ দলসমূহে, আনফালে ককৰোচ জনতা পাৰ্টী আৰু বিভিন্ন ছাত্ৰ সংগঠনে ‘ভোট চুৰি’ৰ অভিযোগত আয়োগ আৰু শাসকীয় বিজেপিক লক্ষ্য কৰি লৈছে। এই পৰিবেশত মোহন ভাগৱতৰ মন্তব্য বিশেষ তাৎপৰ্যপূৰ্ণ বুলি বিবেচিত হৈছে।
