সন্ত্ৰাসবাদৰ বিৰুদ্ধে যুঁজ দিয়াৰ ক্ষেত্ৰত কোনো দ্বিচাৰিতা অৰ্থাৎ দুমুখীয়া নীতি থাকিব নালাগে। তাজিকিস্তানৰ দুশ্বানবেত অনুষ্ঠিত এছচিঅ’ শীৰ্ষ সন্মিলনৰ (SCO summit) ৰাষ্ট্ৰীয় মুৰব্বী পৰ্যায়ৰ বৈঠকত অংশগ্ৰহণ কৰি এই কথা কয় প্ৰতিৰক্ষা মন্ত্ৰী ৰাজনাথ সিঙে (Rajnath Singh)। তেওঁ এই মন্তব্য কৰাৰ সময়ত পাকিস্তানৰ উপ-প্ৰধানমন্ত্ৰী আৰু বৈদেশিক মন্ত্ৰী ইছাক দাৰ তেওঁৰ সৈতে একেলগে বহি আছিল। সন্ত্ৰাসবাদৰ বিপদৰ বিষয়ে উল্লেখ কৰি ৰাজনাথ সিঙে কয়, “সন্ত্ৰাসবাদে সমাজখনক বিপথে পৰিচালিত কৰে। ই আমাৰ যুৱক-যুৱতীসকলক তেওঁলোকৰ প্ৰাপ্য সুযোগৰ পৰা বঞ্চিত কৰে।” এই প্ৰসংগত তেওঁ লগতে কয়, “সন্ত্ৰাসবাদৰ সমৰ্থনত কোনো যুক্তি দিব নোৱাৰি। ইয়াৰ বিৰুদ্ধে যুঁজ দিয়াৰ কোনো দ্বৈত মানদণ্ড নাই। যিসকলে সন্ত্ৰাসবাদীক আৰ্থিকভাৱে বা অন্য কোনো ধৰণে সহায় আৰু আশ্ৰয় দিয়ে তেওঁলোকৰ কোনো স্থান নাই। সন্ত্ৰাসবাদৰ উৎস যৌথভাৱে নিৰ্মূল কৰা উচিত।”
ৰাজনাথ সিঙে এই ক্ষেত্ৰত কোনো দেশৰ নাম উল্লেখ নকৰিলেও বহুতে বিশ্বাস কৰে যে তেওঁ পাকিস্তানক লক্ষ্য কৰি লৈছিল। নতুন দিল্লীয়ে বাৰে বাৰে পাকিস্তানে সন্ত্ৰাসবাদক সমৰ্থন কৰা বুলি অভিযোগ উত্থাপন কৰি আহিছে। ২০২৫ চনৰ এপ্ৰিল মাহত কাশ্মীৰৰ পহেলগামত সংঘটিত সন্ত্ৰাসবাদী আক্ৰমণত ২৬ জন লোকৰ মৃত্যু হোৱাৰ পিছত ভাৰতে পাকিস্তান আৰু পাক অধিকৃত কাশ্মীৰৰ সন্ত্ৰাসবাদী ঘাটিসমূহ ধ্বংস কৰাৰ পৰিকল্পনা কৰিছিল। এনেদৰেই আৰম্ভ হৈছিল সামৰিক অভিযান ‘অপাৰেচন সিন্দুৰ’।
