অভিনেত্ৰী কিয়াৰা আদৱানীয়ে শেহতীয়াকৈ ‘ভুল ভুলেয়া ২’ ছবিখনৰ বাবে বাতৰিৰ শিৰোনাম দখল কৰি আছে। ছবিখনৰ মুক্তিৰ পূৰ্বে, অভিনেত্ৰী গৰাকীয়ে নিৰন্তৰ ভাৱে ইয়াৰ প্ৰচাৰ কৰিছে। ইফালে, অলপতে কিয়াৰাই ‘এম এছ ধোনী’ ছবিখনৰ তেওঁৰ সহ-অভিনেতা আৰু প্ৰয়াত অভিনেতা সুশান্ত সিং ৰাজপুতৰ বিষয়ে কিছু কথা প্ৰকাশ কৰিছে।
২০১৬ চনৰ ছবি ‘এম এছ ধোনী – দ্য আনটোল্ড ষ্টোৰী’ ত সুশান্তে ভাৰতীয় ক্ৰিকেটাৰ মহেন্দ্ৰ সিং ধোনীৰ চৰিত্ৰত অভিনয় কৰিছিল, আনহাতে কিয়াৰাই ছবিখনত তেওঁৰ পত্নী সাক্ষী ধোনীৰ চৰিত্ৰ ৰূপায়ণ কৰিছিল। সুশান্তৰ সৈতে অতিবাহিত কৰা সময়কে ধৰি কিয়াৰাই অভিনেতাজনৰ অভিযান্ত্ৰিক জীৱনৰ পৰা তেওঁৰ দৈনন্দিন ৰুটিনলৈকে বহুতো আকৰ্ষণীয় তথ্য প্ৰকাশ কৰে।
ৰণবীৰ শ্ব’ৰ পডকাষ্টত দিয়া সাক্ষাৎকাৰৰ সময়ত সুশান্তৰ বিষয়ে সোধাত কিয়াৰাই কৈছিল যে, ‘ধোনী’ৰ দৃশ্যগ্ৰহণৰ সময়ত তেওঁ ঔৰঙ্গাবাদত আছিল আৰু কাম শেষ হোৱাৰ পিছত, তেওঁলোকৰ ৰাতিপুৱা সোনকালে ফ্লাইট থকাৰ বাবে তেওঁলোকে শোৱাৰ সলনি ৰাতিটো সাৰ পাই কটোৱাৰ কথা ভাবিছিল। সেই সময়ছোৱাত, সুশান্তে অভিনেত্ৰীগৰাকীক তেওঁৰ যাত্ৰাৰ বিষয়ে কৈছিল। তেওঁ কৈছিল যে তেওঁ এজন অভিযন্তা হোৱাৰ পিছতো কেনেদৰে তেওঁ ‘ধোনী’ ছবিখন পাইছিল, প্ৰীতি জিণ্টাৰ পিছফালে এজন বেকআপ নৃত্যশিল্পীও আছিল আৰু তাৰ পিছত কেনেকৈ নায়ক হ’বলৈ সক্ষম হ’ল সেই আটাইবোৰ কথা সুশান্তে কিয়াৰাক কৈছিল।
কিয়াৰাই লগতে কৈছিল যে সুশান্তৰ তাত সদায় ডাঙৰ কিতাপ আছিল, যিবোৰ তেওঁ সদায় পঢ়িছিল। তেওঁ জীৱনৰ বিষয়ে, মানুহৰ বিষয়ে জানিবলৈ অতি উৎসাহিত আছিল। কিয়াৰাই আৰু কৈছিল যে সুশান্তৰ কাহিনী শুনি, তেওঁ সুশান্তক কৈছিল যে এদিন কোনোবাই তেওঁৰ ওপৰত এখন বায়োপিক নিৰ্মাণ কৰিব কিয়নো তেওঁৰ জীৱন অতি আকৰ্ষণীয়।
কিয়াৰাই আৰু কৈছিল যে, সুশান্ত কামৰ প্ৰতি অতি উৎসাহী আছিল। তেওঁ দিনত মাত্ৰ দুঘণ্টা শুইছিল আৰু কৈছিল যে মানুহৰ শৰীৰক মাত্ৰ দুই ঘণ্টাৰ টোপনিৰ প্ৰয়োজন। সুশান্তে কিয়াৰাক কৈছিল যে এজন ব্যক্তিয়ে যিমানেই শুই নাথাকক কিয়, তেওঁৰ মন কেৱল দুঘণ্টাৰ বাবে বিশ্ৰাম মোডত যায় আৰু সেয়েহে তেওঁক মাত্ৰ দুঘণ্টাৰ টোপনিৰ প্ৰয়োজন। কিয়াৰাই এইটোও কৈছিল যে ইমান কম টোপনি ৰখাৰ পাছতো, সুশান্ত সদায় ছেটত শক্তিৰে পৰিপূৰ্ণ আছিল।