অসমীয়া কবিতাত প্ৰতীকবাদ আৰু চিত্ৰকল্পবাদৰ সুদূৰ প্ৰসাৰী প্ৰভাৱ পেলোৱা কাব্যঋষি নীলমণি ফুকন দেৱক আজি ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মা জীৱনযোৰা সাহিত্য সাধানাৰ প্ৰতিদান স্বৰূপে জ্ঞানপীঠ বঁটা প্ৰদান কৰে।
১৯৩৩ চনৰ ১০ ছেপ্টেম্বৰত গোলাঘাট জিলাৰ দেৰগাঁৱত জন্মগ্ৰহণ কৰা নীলমণি ফুকন দেৱে ১৯৬১ চনত গুৱাহাটী বিশ্ববিদ্যালয়ৰ পৰা ইতিহাস বিষয়ত স্নাতকোত্তৰ ডিগ্ৰী লাভ কৰিছিল ৷ ১৯৬৪ চনত তেওঁ অধ্যাপক হিচাপে যোগদান কৰে আৰ্য বিদ্যাপীঠ মহাবিদ্যালয়ত ৷ ১৯৯২ চনত এই পদৰ পৰা অৱসৰ গ্ৰহণ কৰা নীলমণি ফুকন দেৱে কবিতা লিখা আৰম্ভ কৰিছিল ১৯৫০ চনৰ পৰা ৷
বিগত শতিকাৰ ৫০ দশকৰ পৰা জীৱনৰ সৰ্বস্ব কবিতা আৰু কলাৰ বাবেই তেখেতে উৎসৰ্গা কৰিছে। মানৱ জীৱনবোধৰ কথাবোৰ তেখেতে অতি সচেতনতাৰে কবিতাত প্ৰকাশ কৰিছে। সততা আৰু নিষ্ঠাৰে কাব্য সাধনা কৰি যাওঁতে তেখেতে ক’তো থমকি ৰোৱা নাই। নিজস্ব স্বকীয় কাব্যধাৰাৰে মহিমামণ্ডিত শিল্পীগৰাকীৰ সুস্বাস্থ্য আৰু দীৰ্ঘায়ু কামনা কৰিছে তেখেতৰ প্ৰতিগৰাকী গুণমুগ্ধ তথা শুভাকাংক্ষীয়ে।
