ASSAM TIMES POST
ডিব্ৰুগড়ঃ ডিব্ৰুগড়ৰ বৈৰাগীমঠত আজি সংঘটিত হয় এক শোকাবহ পথ দুৰ্ঘটনা। উক্ত দুৰ্ঘটনাত স্থানীয় দুগৰাকী মহিলাৰ মৃত্যু হোৱাত অঞ্চলটোত গভীৰ শোকৰ ছাঁ পৰিছে। জানিব পৰা মতে আন দিনাৰ দৰে আজিও জোনালী দত্ত আৰু মিনু গগৈ নামৰ দুগৰাকী মহিলাই প্ৰাতঃভ্ৰমনৰ বাবে উলাই আহিছিল আৰু ৰাজপথৰ কাষে কাষে খোজকাঢ়ি গৈ আছিল।
তেনেতে এএচ-০৬ চি-২১৪৭ নম্বৰৰ তীব্ৰ গতিত অহা এখন মাৰুতি জেনে নিয়ন্ত্ৰন হেৰুৱাই খুন্দিওৱাৰ ফলত মৃত্যু দুয়োগৰাকী প্ৰাতঃভ্ৰমনলৈ অহা মহিলা। ঘটনাত ঠিতাতে নিহত মিনু গগৈ নামৰ মহিলাগৰাকী আৰু চিকিৎসালয়লৈ নিয়াৰ পথত মৃত্যু হয় জোনালী দত্তৰ।
ডিব্ৰুগড়ৰ প্ৰয়াত থাৰ্মেল নিজ কদমনিৰ উমা গগৈৰ পত্নী মিনু গগৈয়ে (৫০) দুগৰাকী কন্যাৰ লগতে বহু আত্মীয় স্বজনক এৰি গৈছে।ইফালে থাৰ্মেল নিজ কদমনিৰ যোগীৰাজ দত্তৰ পত্নী, জোনালী দত্ত (৪৬)ই একমাত্ৰ কন্যাগৰাকীক এৰি থৈ যায়। জানিব পৰা মতে জেনখন মনোজ ভূঞা আৰু অভিনৱ দত্ত(২১) নামৰ দুজন যুৱকে শিকি আছিল।
শাৰদীয় পূজাৰ প্ৰাকক্ষণত দুগৰাকীকৈ মহিলা প্ৰাতঃভ্ৰমনলৈ গৈ অকাল মৃত্যুক সাৱতি লোৱা ঘটনাই গভীৰ শোকৰ ছাঁ পেলাইছে। ডিব্ৰুগড়ৰ ৰাজপথত পুৱাৰ ভাগত প্ৰতিদিনে ন-শিকাৰু গাড়ীয়ে পথচাৰীক বিপদত পেলাই আহিছে যদিও কৰ্তৃপক্ষই বিশেষ পদক্ষেপ গ্ৰহণ নকৰাত আজি দুৰ্ঘটনাটো সংঘটিত হয়।
