অনিদিষ্ট কাললৈ প্ৰশাসনে বন্ধ কৰিলে শ্বপিং মল পেণ্টালোন
ASSAM TIMES POST
বিভাস দুৱৰা, ডিব্ৰুগড়ঃ ডিব্ৰুগড়ত কালি শুভ উদ্বোধন কৰা পেণ্টালোন নামৰ শ্বপিং মলত আজি এজন যুৱকৰ মৃতদেহ উদ্ধাৰক কেন্দ্ৰ কৰি এক উত্তপ্ত পৰিস্থিতি সৃষ্টি হয়। লাটু দিহিঙ্গীয়া(২৫) নামৰ যুৱক জনৰ মৃতদেহ উদ্ধাৰক কেন্দ্ৰ কৰিয়েই সৃষ্টি হয় এই উতপ্ত পৰস্থিতি। জানিব পৰা মতে লাটু দিহিঙীয়া ডিব্ৰুগড় বৰবৰুৱাৰ বাৰতি গাওঁৰ বাসিন্দা গোলাপ দিহিঙীয়া আৰু জিনু দিহিঙীয়াৰ পুত্র আৰু তেওঁ কেইবা মাহৰপৰা নিৰ্মীয়মান ৰংঘৰ প্লাজা নামৰ শ্বপিং মলটোৰ কৰ্মী হিচাপে নিযুক্ত হৈ আছিল।
শ্বপিং মলটোতে আন কৰ্মী সকলৰ লগত থাকি কাম কৰি আছিল স্থানীয় লাটু নামৰ যুৱক জনে। ডিব্ৰুগড়ৰ এইচ এছ ৰোডত থকা এই পেন্টালোন নামৰ শ্বপিং মলটোত যোৱা শুকুৰবাৰৰ পৰা নিৰুদ্দেশ হৈ থকা যুৱক জনৰ মৃতদেহ আজি নিৰ্মীয়মান শ্বপিং মলটোৰ লিফটৰ গাঁতত ৰহস্যজনক ভাবে পানীত ওপঙি থকা অৱস্থাত উদ্ধাৰ হয়।
নিৰুদ্দিষ্ট যুৱক জনৰ মৃতদেহ এনেদৰে উদ্ধাৰ হোৱাৰ পিছতে সকলোতে একপ্ৰকাৰ হুৱাদুৱা লাগে। যুৱকজনৰ গাঁৱৰ শতাধিক লোক আজি পুৱাৰ ভাগত উক্ত মলত উপস্থিত হৈ এক উত্তপ্ত পৰিস্থিতিৰ সৃষ্টি কৰে। সকলোৱে এয়া এক পৰিকল্পিত হত্যকাণ্ড বুলি অভিযোগ কৰে।
কালি লাটু নামৰ যুৱকজন নিৰুদ্দেশ হোৱাৰ সন্দৰ্ভত শ্বপিং মল কৰ্তৃপক্ষক পৰিয়ালৰ লোকে অৱগত কৰিছিল যদিও কৰ্তৃপক্ষই এই বিষয়ে কোনো গুৰুত্ব প্ৰদান নকৰাৰ অভিযোগ কৰে পৰিয়ালবৰ্গই। আজি পুৱাৰ ভাগত পৰিয়ালৰ লোকে যুৱকজনক বিচাৰি আহিছিল যদিও শ্বপিং মল কৰ্তৃপক্ষই তেওঁলোকক ভিতৰলৈ যাবলৈ দিয়া নাছিল।
পিছত পৰিয়ালৰ লোকে বলপূৰ্বকভাবে ভিতৰলৈ সোমাই বিচাৰ- খোঁচৰ কৰাতহে মৃতদেহটো উদ্ধাৰ হয়। ঘটনাৰ খবৰ পাই ঘটনাস্থলীত ডিব্ৰুগড়ৰ অতিৰিক্ত আৰক্ষী অধীক্ষক ধ্ৰুৱজ্যোতি বড়াৰ নেতৃত্বত এক বৃহৎ আৰক্ষী, অৰ্ধসামৰিক বাহিনী আৰু দণ্ডাধীশ উপস্থিত হৈ পৰিস্থিতি নিয়ন্ত্ৰণ কৰে।
আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে অসম চিকিৎসা মহাবিদ্যালয়লৈ প্ৰেৰণ কৰে। লগতে ঘটনাৰ লগত জৰিত থকাৰ সন্দেহত শ্বপিং মলটোৰ পৰিচালককে ধৰি ১৫ জন কৰ্মচাৰীক আটক কৰে ডিব্ৰুগড়ৰ আৰক্ষীয়ে। ইফালে শ্বপিং মলটোৰ স্বত্বাধিকাৰী তথা অভিযন্তা হৰিশ বৰুৱা ঘটনাৰ পিছতে পলায়ন কৰিছে বুলি জানিব পৰা গৈছে।
যুৱক জনৰ মূৰত স্পষ্টকৈ আঘাতৰ চিহ্ন থকাত এয়া এক হত্যাকাণ্ড বুলি আৰক্ষীৰ প্ৰাথমিক তদন্তত স্পষ্ট হৈছে। আনহাতে দোষীক শ্ৰীঘে কৰায়ত্ত কৰাৰ দাবীৰ লগতে পৰিয়ালক ২০ লাখ টকাৰ ক্ষতিপূৰণ আৰু পত্নী দিম্পী দিহিঙীয়াক কৰ্ম সংস্থাপন দিয়াৰো ভালেকেইটা সংগঠনে দাবী জনায়।
ইয়াৰ উপৰি যুৱকজনৰ কন্যাৰ সম্পূৰ্ণ ভৰণ-পোষণৰ দাবীত টাই আহোম যুৱ পৰিষদ, টাই আহোম ছাত্র সন্থা আৰু স্থানীয় ৰাইজে ডিব্ৰুগড় সদৰ আৰক্ষী থানা ঘেৰাও কৰি পৰিস্থিতি উত্তাল কৰি তোলে। তাৎপৰ্যপূৰ্ণ যে যোৱা শুক্ৰবাৰে উদ্বোধন কৰা মলটোৰ আধাৰশিলা সময়টো কৰ্মৰত এজন শ্ৰমিক শোকাৱহ ভাবে মৃত্যু হৈছিল। পুনৰ মলটোৰ নিৰাপত্তা দিশটো নুচুৱাকৈ পৌৰসভা তথা শংশ্লিষ্ট বিভাগ আৰু জিলা প্ৰশাসনে মুকলিৰ বাবে কেনেকৈ অনুমতি দিলে সেইয়াও এতিয়া ৰহস্যৰ আৱৰ্তত। ইতিমধ্যে জিলা প্ৰশাসনে মলটোৰ সকলো নথিপত্ৰ জব্দ কৰা লগতে অনিদিষ্ট কাললৈ সকলো জনসাধাৰণৰ বাবে মলটো বন্ধ কৰি দিয়া বুলি জানিব পৰা গৈছে।
