ASSAM TIMES POST
গুৱাহাটীঃ দুৰ্গাপূজাৰ প্ৰাকক্ষণত অহা ৩ অক্টোবৰত উজনি-নামনি অসমৰ যোগাযোগ ব্যাহত হোৱাৰ সম্ভাৱনা প্ৰকাশ পাইছে। কিয়নো সদৌ অসম মটৰ পৰিবহণ সন্থাই ব্যৱসায়িক যান-বাহনৰ ভাড়া পুনৰ নিৰ্ধাৰণ কৰিবলৈ চৰকাৰক অহা ৩০ ছেপ্টেম্বৰৰ সময়সীমা বান্ধি দিছে।
যদিহে তাকে নকৰে, অহা ৩ অক্টোবৰৰ পুৱা ৫ বজাৰ পৰা ৪ অক্টোবৰৰ পুৱা ৫ বজালৈ ২৪ ঘন্টীয়া চকা বন্ধৰ কাৰ্যসূচী ৰূপায়ণ কৰিব সন্থাই। এই সম্পৰ্কত সন্থাই জনোৱা মতে, ২০১২ চনৰ ১১ অক্টোবৰত অসমৰ ব্যৱসায়িক যান-বাহনৰ ভাড়া পুনৰ নিৰ্ধাৰণৰ পাছত পেট্ৰ’পণ্যৰ মূল্যবৃদ্ধি, অত্যধিক চৰকাৰী কৰ-কাটল বৃদ্ধি আদিৰ প্ৰতি লক্ষ্য ৰাখি ২০১৬ৰ পৰাই ব্যৱসায়িক যান-বাহনৰ ভাড়া পুনৰ নিৰ্ধাৰণৰ বাবে সদৌ অসম মটৰ পৰিবহণ সন্থাই চৰকাৰক দাবী জনাই আহিছিল।
২০১৮ৰ আগষ্ট মাহত পেট্ৰ’পণ্যৰ মূল্যই প্ৰায় শতকৰ ঘৰ স্পৰ্শ কৰাত পৰিবহণ মন্ত্ৰীক এখন স্মাৰক পত্ৰ প্ৰদান কৰিছিল সন্থাই। কিন্তু ইয়াত ফল নধৰাত চলিত বৰ্ষৰ ১১ জুলাইত পুনৰ বিভাগীয় মন্ত্ৰীক স্মাৰক পত্ৰযোগে শীঘ্ৰে ভাড়া নিৰ্ধাৰণৰ বাবে সন্থাই অনুৰোধ জনোৱা সত্বেও গুৰুত্ব নিদিয়াৰ পৰিপ্ৰেক্ষিততেই চকা বন্ধৰ কাৰ্যসূচীৰ হুংকাৰ দিছে সন্থাই।
