ASSAM TIMES POST
বিভাস দুৱৰা, ডিব্ৰুগড়ঃ উজনিত কাৰ নেতৃত্বত চলিছে গৰু ছিণ্ডিকেট। প্ৰতি নিশাই সৰবৰাহ হয় গাড়ীয়ে গাড়ীয়ে গৰুৰ চোৰাং বেহা। প্ৰতি নিশাই আৰক্ষীৰ চকুত ধুলি দি বগীবিল দলঙৰে সৰবৰাহ হৈ আছে বিশাল বিশাল পশুধনৰ চোৰাং গাড়ী সৰবৰাহ হৈয়ে আছে একাংশ ধুৰন্ধৰ ব্যৱসায়ী আৰু বিজেপি নামধাৰী একাংশ ব্যক্তিৰ সহযোগত।
যোৱা নিশা পুনৰ ডিব্ৰুগড় বগীবিলত চোৰাং গৰু ভৰ্তি এক বিশাল ট্ৰাক জব্দ কৰে স্থানীয় সংগঠনৰ সহযোগত আৰক্ষীয়ে। এখন ১৬ চকাৰ বিশাল ট্ৰাকত লৈ আহিছিল ৩৬ টাকৈ গৰু। এ এচ ০১এল চি ০৫৪৬ নম্বৰৰ ১৬ চকাৰ ট্ৰাকখনে পান জপা দি জাপি নিছিল গৰুবোৰ ব্ৰহ্মপুত্ৰৰ উত্তৰ পাৰৰ পৰা। ধেমাজি জিলাৰ গেলুৱাৰ পৰা কুলাজান হৈ বগীবিল দলং পাৰ হৈ গুৱাহাটী অভিমুখে নিয়াৰ বাবে চেষ্টা কৰিছিল গৰুবোৰ৷
বগীবিলত নিয়মীয়া তালাচীত আৰক্ষীয়ে প্ৰথমে সন্দেহ কৰি জব্দ কৰে চোৰাং গৰু ভৰ্তি ট্ৰাকখন।আৰক্ষীয়ে বগীবিলৰ পৰা ট্ৰাকখন জব্দ কৰাৰ সময়তে ট্ৰাকখনত অহা হেণ্ডিমেনসহ আন এজন পলায়ন কৰে যদিও চালক ছামাদ আলিক গ্ৰেপ্তাৰ কৰে। আৰক্ষীয়ে ট্ৰাকসহ চোৰাং গৰুবোৰ জব্দ কৰি তদন্ত অব্যাহত ৰাখিছে।
জানিব পৰা মতে, উত্তৰ পাৰৰ ধেমাজিৰ গেলোৱাৰ জনৈক হাইদৰ নামৰ ব্যৱসায়ী এজনৰ নেতৃত্বত বগীবিল দলঙেৰে ব্ৰহ্মপুত্ৰৰ উত্তৰ পাৰৰ পৰা দীৰ্ঘদিনৰ ধৰি গৰুৰ ৰমৰমীয়া ব্যৱসায় চলি আহিছে।
যোৱা নিশাও উক্ত ৩৬ টাকৈ গৰু গুৱাহাটী অভিমুখে নিছিল ব্যৱসায়ীটোৱে। আনহাতেদি অভিযোগ মতে উজনিত পোৱালি, গেলোৱা, আজাদ, হাতুৱা, চফুল, বুবুল, ভাইটী, আইনুল, পলুৱা,পুলিল, চেখবৰ, হাইডৰ খান, ৰঙাই,মালেক, কুকিল, পাপু আলি, নুৰুল হুছেইন, চাবুদ্দিন, বাব্লু, অহিদ্দুল নামৰ বহুৰে নাম সকলোৰে মুখে মুখে যদিও এই সকলক কোনেও নাকী লগাব নোৱাৰাটোও আশ্চৰ্যকৰ বিষয়ত পৰিণত হৈছে। এইসকল ব্যৱসায়ীয়ে নিশাৰ অন্ধকাৰত গৰুৰ চোৰাং ব্যৱসায়ত জড়িত হৈ থকাৰ নিশ্চিত প্ৰমান আছে যদিও আৰক্ষী নিৰ্বিকাৰ।
বিভিন্ন সময়ত স্থানীয় লোক আৰু সংগঠনেও আৰক্ষীৰ সহযোগত কেইবাখনো গাড়ী জব্দ কৰিবলৈ সক্ষম হৈছে যদিও উজনিৰ পৰা অব্যাহত থকা গৰুৰ চোৰাং বজাৰখন উৎখাত কৰিবলৈ সক্ষম হোৱা নাই আৰক্ষী। যোৱা ২ ছেপ্টেম্বৰটো ডিব্ৰুগড়ত আৰক্ষীয়ে লাহোৱালৰ ৰাজপথত খেদি খেদি ৩৩ টাকৈ বলধ গৰু ট্ৰাকসহ জব্দ কৰাৰ বিষয়ে সংবাদ মাধ্যমত ইতিমধ্যে সবিস্তাৰে প্ৰকাশ হৈ গৈছে। কিন্তু উক্ত দিনাও গৰুৰ চোৰাং ব্যৱসায়ত জড়িত কোনো এজনকে গ্ৰেপ্তাৰ কৰিবলৈ সক্ষম নহ’ল।
এতিয়া ৰাইজৰ প্ৰশ্ন বগীবিলকে ধৰি ৩৭নং ৰাষ্ট্ৰীয় ঘাইপথত নিশাৰ ভাগত গৰু, কাঠ, কয়লা আদিৰ চোৰাং সামগ্ৰীৰ কৰিডৰলৈ ৰূপান্তৰিত কৰা মাফিয়া চক্ৰক উৎখাত কৰাৰ ক্ষেত্ৰত কেনেকৈ সফল হ’ব আৰক্ষী। শূন্য সহনশীলতাৰ কথা আওৰাই থকা মুখ্যমন্ত্ৰী সোনোৱালৰ গৃহ জিলাত সংঘটিত হৈ থকা এনেবোৰ ঘটনা ৰুধিবলৈ কেতিয়াকৈ সক্ষম হ’ব সেইয়া ৰাইজৰ মাজত লাখটকীয়া প্ৰশ্ন৷ নিশাৰ ভাগত গৰু, কাঠ, কয়লা আদিৰ চোৰাং সামগ্ৰীৰ কৰিডৰলৈ ৰূপান্তৰিত কৰা মাফিয়া চক্ৰক উৎখাত কৰাৰ ক্ষেত্ৰত কেনেকৈ সফল হ’ব আৰক্ষী তাকে লৈ বিভিন্ন মহলত আলোচনা হৈছে৷
