ASSAM TIMES POST
গুৱাহাটীঃ সদ্য প্ৰকাশিত অসমৰ উন্নীত ৰাষ্ট্ৰীয় নাগৰিক পঞ্জী বাতিল কৰা, ১৯৫১ চনৰ ভিত্তিত নতুন এনআৰচি প্ৰস্তুতৰ দাবীত ৰাষ্ট্রীয় বজৰং দলে শুকুৰবাৰে আহ্বান জনোৱা ১২ ঘন্টীয়া অসম বন্ধলৈ সঁহাৰি জনোৱা নাই ৰাজ্যবাসীয়ে।
গুৱাহাটী মহানগৰটো আন দিনাৰ দৰে সকলো লোক নিজ নিজ ক্ষেত্ৰলৈ উলাই আহে। পুৱাৰেপৰা মহানগৰখনত চিটি বাছ, ট্ৰেকাৰ, মেজিকৰ চলাচল স্বাভাৱিক। দোকান-পোহাৰ তথা ব্যৱসায়িক প্ৰতিষ্ঠানসমূহো সঠিক সময়তে খোলা হৈছে। উত্তৰ পূৰ্বাঞ্চলৰ ব্যৱসায়িক হৃদস্পন্দন ফাঁচীবজাৰকো অসম বন্ধই প্ৰভাৱিত কৰিবপৰা নাই।
মহানগৰখনৰ আন আন ব্যস্তময় অঞ্চল যথা খানাপাৰা, পল্টন বজাৰ, মালিগাঁও, জালুকবাৰী, চানমাৰি, নাৰেংগী আদিতো বন্ধৰ লেশমানো প্ৰভাৱ পৰা নাই। ইয়াৰ বিপৰীতে ডিব্ৰুগড়, নলবাৰী, ধুবুৰীত বন্ধৰ আংশিক প্ৰভাৱ পৰিছে বুলি সংবাদ মাধ্যমৰ বাতৰিত প্ৰকাশ পাইছে।
ইফালে নলবাৰী আৰু ধুবুৰীত ৰাজপথত টায়াৰ জ্বলাই ৰাষ্ট্ৰীয় বজৰং দলৰ সদস্যই প্ৰতিবাদ সাব্যস্ত কৰে। ডিব্ৰুগড়ত একাংশ বন্ধ সমৰ্থকে দৰ্শকক চিত্ৰগৃহত প্ৰৱেশত বাধা প্ৰদান কৰে। অৱশ্যে গুৱাহাটী তথা ৰাজ্যৰ আন আন প্ৰান্তৰ ছবিগৃহত এনে হোৱা নাই। উল্লেখ্য আন্তঃৰাষ্ট্ৰীয় হিন্দু পৰিষদে এই বন্ধলৈ সমৰ্থন জনাইছিল।
