ASSAM TIMES POST
যোৰহাটঃ যোৰহাটৰ টীয়ক চাহ বাগিচাৰ চিকিৎসালয়ত যোৱা ৩১ আগষ্টত চামৰা মাঝি নামৰ এজন লোকৰ মৃত্যুক কেন্দ্ৰ কৰি হোৱা অপ্ৰীতিকৰ পৰিস্থিতিত একাংশ উত্তেজিত শ্ৰমিকৰ হাতত গুৰুতৰভাৱে আহত হৈ মৃত্যুবৰণ কৰা চিকিৎসালয়খনৰ চিকিৎসক দেৱেন দত্তৰ দুখজনক ঘটনাটোৱে দেশজুৰি প্ৰতিক্ৰিয়াৰ সৃষ্টি কৰিছে।
এই ঘটনাত ক্ষোভিত হৈ পৰিছে সমগ্ৰ ৰাষ্ট্ৰৰ চিকিৎসকসকল। সমগ্ৰ ঘটনাটোক গুৰুত্ব সহকাৰে লৈছে ভাৰতীয় চিকিৎসা সংস্থাই৷ বুধবাৰে পুৱা ভাৰতীয় চিকিৎসা সংস্থাৰ সভাপতি ডাঃ শান্তনু সেনৰ নেতৃত্বত অহা এটা সঁজাতি দলে টীয়কৰ জগদুৱাৰস্থিত প্ৰয়াত ডাঃ দেৱেন দত্তৰ বাসভৱনত উপস্থিত হৈ পৰিয়ালটোক সমবেদনা জনোৱাৰ লগতে ঘটনাটোত দুখ প্ৰকাশ কৰে আৰু প্ৰতি ক্ষেত্ৰতে ডাঃ দেৱেন দত্তৰ পৰিয়ালৰ লগত থাকিব বুলি আশ্বাস দিয়ে।
আনহাতে ডাঃ দেৱেন দত্তৰ হত্যাকাণ্ডৰ ঘটনাটোত ৰাজ্য চৰকাৰৰ ভূমিকাক ভাৰতীয় চিকিৎসা সংস্থাৰ সভাপতি ডাঃ শান্তনু সেনে কঠোৰভাৱে সমালোচনা কৰি সাংবাদিকৰ আগত কয় যে ঘটনাটো সন্দৰ্ভত ২৪ ঘন্টাৰ ভিতৰত অসমৰ মুখ্যমন্ত্ৰীয়ে চৰকাৰৰ স্থিতি স্পষ্ট নকৰিলে দেশজুৰি চিকিৎসকৰ আন্দোলন গঢ়ি তোলা হ’ব আৰু এই সময়ছোৱাত জৰুৰীকালীন চিকিৎসা সেৱাৰ পৰাও চিকিৎসকসকল বিৰত থাকিব৷
ভাৰতীয় চিকিৎসা সংস্থাৰ সভাপতি ডাঃ শান্তনু সেনে ডাঃ দেৱেন দত্তৰ হত্যাকাণ্ডৰ তদন্তকাৰী বিষয়া তথা অতিৰিক্ত উপায়ুক্ত শোভন গোৱালাৰ নিৰপেক্ষতাৰ ওপৰত সন্দেহ প্ৰকাশ কৰি গুৰুত্বপূৰ্ণ মন্তব্য ৰাখে। ইতিমধ্যে ভাৰতীয় চিকিৎসা সংস্থাই উক্ত ঘটনাটো সন্দৰ্ভত উপায়ুক্তৰ জড়িয়তে প্ৰধানমন্ত্ৰী, গৃহমন্ত্ৰী আৰু কেন্দ্ৰীয় স্বাস্থ্যমন্ত্ৰীলৈ স্মাৰকপত্ৰ প্ৰেৰণ কৰিছে বুলি জানিবলৈ দিয়ে। ভাৰতীয় চিকিৎসা সংস্থাৰ কেন্দ্ৰীয় নেতৃত্বই চৰকাৰে কৰ্মৰত চিকিৎসকক নিৰাপত্তা প্ৰদান নিশ্চিত কৰিবই লাগিব বুলি দাবী জনায়৷
