ষ্টাফ ৰিপ’ৰ্টাৰ:
দুৰ্নীতি আৰু ভ্ৰষ্টাচাৰৰ যেন এক চিহ্ন হৈ পৰিছে অসম আৰক্ষী৷ এছআই পৰীক্ষাৰ প্ৰশ্নকাকত-কাণ্ডৰ ন ন তথ্য উদ্ধাৰ হৈ থকাৰ সময়তে এইবাৰ দুৰ্নীতি নিবাৰক শাখাৰ অভিযানত গ্ৰেপ্তাৰ হ’ল মৰিগাঁও সদৰ থানাৰ সহকাৰী উপ-পৰিদৰ্শক পংকজ বৰা। থানাৰ ভিতৰত ঘোচ লৈ থাকোতেই দুৰ্নীতি নিবাৰক শাখাই বৰা কহাতে-লোটে ধৰা পেলায় আৰু গ্ৰেপ্তাৰ কৰে৷
জানিব পৰা মতে, আজি বিয়লি প্ৰায় ৪মান বজাত গুৱাহাটীৰ পৰা যোৱা দুৰ্নীতি নিবাৰক শাখাৰ এটা দলে মৰিগাঁও সদৰ থানাত অভিযান চলায়৷ দলটোৰ অভিযানকালতে জনৈক জনিৰাম বৰদলৈ নামৰ এজন ব্যক্তিৰ পৰা এটা গোচৰ সন্দৰ্ভত সহকাৰী উপ-পৰিদৰ্শক পংকজ বৰাই ৪ হাজাৰ টকা ঘোচ লোৱা অৱস্থাত ধৰা পৰে৷ ঘোচ লোৱা ধৰা পৰাৰ পিছতে দলটোৱে বৰাক গ্ৰেপ্তাৰ কৰে।
ঘটনাৰ বিৱৰণী মতে, প্ৰায় এমাহ পূৰ্বে জনিৰাম বৰদলৈয়ে তেওঁৰ পত্নী নিৰুদ্দেশ হোৱাৰ এটি গোচৰ তৰে। এই গোচৰটোৰ বাবদ সহকাৰী উপ-পৰিদৰ্শক পংকজ বৰাই দিনা হাজিৰা কৰা তেওঁৰ পৰা ১০ হাজাৰ টকা দাবী কৰাৰ অভিযোগ উত্থাপন কৰে পংকজ বৰদলৈয়ে। কিবা প্ৰকাৰে যোগাৰ কৰি ইয়াৰে ৫ হাজাৰ টকা ব্যক্তিজনে আদায় দিয়ে যদিও গোচৰটোৰ অনুসন্ধানৰ কাম আৰম্ভ কৰাৰ পৰিৱৰ্তে এএছআই বৰাই বাকী ধন আদায় কৰাতহে গুৰুত্ব দিয়ে৷ যাৰ ফলত উপায়ন্তৰ হৈ জনিৰামে অসম আৰক্ষীৰ দুৰ্নীতি নিবাৰক শাখাৰ ওচৰ চাপে।
তাৰ পৰিপ্ৰেক্ষিততে আজি পূৰ্ব পৰিকল্পনা মতে পুৱা ৯ বজাত দুৰ্নীতি নিবাৰক শাখাৰ এটা দল মৰিগাঁৱত উপস্থিত হয়। দিনটো অপেক্ষাৰ অন্তত দলটোৱে বিয়লি ৪ বজাত ধন লৈ থকা অৱস্থাতে মৰিগাঁও সদৰ থানাৰ ভিতৰতে এএছআই পংকজ বৰাক গ্ৰেপ্তাৰ কৰে। ঘোচখোৰ আৰক্ষী বিষয়াজনৰ পৰা দুৰ্নীতি নিবাৰক শাখাৰ দলটোৱে ঘোচ লোৱা ৪ হাজাৰ টকাৰ লগতে আন ২০ হাজাৰ টকা উদ্ধাৰ কৰে। কিন্তু বাকী ২০ হাজাৰ টকা সম্পৰ্কে সবিশেষ জানিব পৰা হোৱা নাই৷
