ASSAM TIMES POST
গুৱাহাটীঃ জনপ্ৰিয় অভিনেতাৰ মিমিক্ৰি আমি সকলোৱে দেখিছো। বিশিষ্ট গায়কৰ বডি লেংগুৱেজ, গেট আপৰে ‘নকল অমুক’ বা ‘জুনিয়ৰ তমুক’কো সময়ে-সময়ে পাই আহিছো। অসমৰ ক্ষেত্ৰত হ’লে জুনিয়ৰ জুবিন গাৰ্গ, জুনিয়ৰ পাপন ইত্যাদি। এনে ক্ষেত্ৰত, বিশেষকৈ জনপ্ৰিয় গায়ক এজনৰ ‘নকল’ বা ‘জুনিয়ৰ’ হ’বলৈ যাওঁতে হওঁতাজনে সদায়েই কণ্ঠটোতকৈ সাজ-পোছাকতহে (নিৰ্দিষ্ট গায়কজনে পিন্ধা) গুৰুত্ব দিয়ে।
বেশভূষা, অভিব্যক্তিৰ তুলনাত কণ্ঠটোৰ সাদৃশ্যতা বহু পৃথক হয়। কিন্তু সাম্প্ৰতিক সময়ত এনে এগৰাকী মহিলা চৰ্চাৰ কেন্দ্ৰবিন্দু হৈ পৰিছে যে তেওঁৰ মাত্ৰ কণ্ঠটো শুনি থাকিলেই চিৰসেউজ গায়িকা লতা মংগেশকাৰে গান গাই থকাৰ নিচিনা লাগিব আপোনাৰ। অৰ্থাৎ তেওঁ দেখিবলৈ লতা মংগেশকাৰহে নহয়, কিন্তু বাকীখিনি লতা মংগেশকাৰৰ সৈতে একে।
সিদিনাখন পশ্চিমবংগৰ ৰাণাঘাট ষ্টেচনটো তেনেকুৱাই হৈছিল। লতাজীয়ে তেওঁৰ চিৰস্মৰণীয় ‘এক প্যাৰ কা নাগমা হে’ শীৰ্ষক গীতটো ষ্টেচনত বহি গাই আছে। হয়তু নেদেখাকৈ মাথো ৰিণিকি ৰিণিকি শুনিয়েই তেনেকৈয়ে ভাবিছিল ষ্টেচনত সমাগম হোৱা লোকসকলে।
কিন্তু খোচ-খবৰ কৰাত তেওঁ ৰাণু মণ্ডল বুলিহে পৰিচয় দিয়ে। সম্প্ৰতি তেওঁৰ এই গীতৰ ভিডিঅ’টো ভাইৰেল হৈ পৰিছে। কণ্ঠত সাইলাখ লতা মংগেশকাৰ।
সকলো মাধ্যমতে ৰাণু মণ্ডলৰ ভিডিঅ’টো প্ৰত্যক্ষ কৰি চকু সেমেকি উঠাৰ পূৰ্বেই তেওঁ এটা নতুন জীৱন লাভ কৰি পেলাইছিল। ষ্টেচনৰ প্লেটফৰ্মত জীৱন কটোৱা ৰাণু মণ্ডলক প্ৰতিজন হৃদয়বান লোকেই সহায়ৰ হাত আগবঢ়াইছিল। আউলি-বাউলি হৈ থকা চুলিকোছাৰপৰা আৰম্ভ কৰি সাজ-পাৰলৈকে, একেবাৰে নতুন হৈ পৰিছিল তেওঁ। ষ্টেচনৰপৰা সুন্দৰ বাসোপযোগী স্থানলৈ স্থানান্তৰিত হয় তেওঁ।
তাৎপৰ্যপূৰ্ণভাৱে ‘বৰপেটা টাউন দ্য প্লেছ অৱ পীচ’ নামৰ এটা ফেচবুক পেজে প্ৰথমবাৰৰ কাৰণে তেওঁৰ এই সমধুৰ কণ্ঠ লোকচক্ষুৰ আগত তুলি ধৰিছিল। এজন দুজনকৈ ৪ মিলিয়নৰো অধিক (এতিয়াও চায়েই আছে)লোকে এই ভিডিঅ’টো চাইছে। সমান্তৰালভাৱে লাইক, কমেন্ট আৰু শ্বেয়াৰ। কাৰো ভাষা নাই। আশ্চৰ্য প্ৰকাশ কৰিছে সকলোৱে। ‘হয়, কণ্ঠটো লতা মংগেশকাৰৰ সৈতে একে’, সকলোৰে মুখত একেটাই কথা।
সমান্তৰালভাৱে ৰাণু মণ্ডলক লৈ সকলোৰে ভাগে-ভাগে পৰিকল্পনা। এখন উপযুক্ত মঞ্চ প্ৰদান কৰিব। ভিডিঅ’টো আপল’ড কৰাৰ পাছত একেটা ফেচবুক পেজেই কিদৰে তেওঁৰ চুলিখিনি চিজিল কৰাৰপৰা নতুন কাপোৰ পিন্ধাই এটা নতুন জীৱন প্ৰদান কৰা হয়, তাৰ ভিন্ন মুহূৰ্তৰ আলোকচিত্ৰসমূহো আপল’ড কৰিছে। এইখিনিয়েও সকলোকে এবাৰ ভৱাই তুলিছে। সকলো অবাক। এইকেইটা দিনৰ মাজতে শেহতীয়াকৈ ৰাণু মণ্ডলে মুম্বাইত এটা ৰিয়েলিটী টিভি শ্ব’লৈ নিমন্ত্ৰণ লাভ কৰিছে।
ৰাণু মণ্ডলৰ বয়স ৫৫ মান বুলি অনুমান কৰা হৈছে। ভিডিঅ’টো প্ৰত্যক্ষ কৰিলেই সকলোৱে বুজি উঠিব যে তেওঁৰ জীৱন যাত্ৰা আন দহগৰাকী মহিলাৰ সৈতে একে নাছিল। তেওঁৰ সকলো পৰিচয় লাভ কৰিবলৈ হয়তু আমি আৰু কিছুদিন অপেক্ষা কৰিব লাগিব।
