নিউজ ডেক্স:
বিকল্প ৰাজনৈতিক দল গঠনত এখোজ আগবাঢ়িল সদৌ অসম ছাত্ৰ সন্থা ,অসম জাতীয়তাবাদী যুৱ ছাত্ৰ পৰিষদ।জাতীয় সংগঠন দুটাৰ প্ৰচেষ্টাত গঠন হ’ল ‘অসম পৰামৰ্শদাতা কমিটি’।
শিক্ষাবিদ ডক্টৰ নগেন শইকীয়া আৰু পদ্মশ্ৰী ডক্টৰ অৰূপ কুমাৰ দত্তক উপদেষ্টা হিচাপে লৈ গঠিত কমিটিত আছে ১৬ গৰাকীকৈ সদস্য।পানবজাৰৰ হোটেল প্ৰাগ কন্ত্রিনেলত সংগঠন দুটাই আজি যুটীয়া ভাৱে সম্বোধন কৰা সংবাদমেলত ঘোষণা কৰে এই কথা।
অসমৰ খিলঞ্জীয়া মানুহৰ সুৰক্ষিত ভৱিষ্যত নিশ্চিত কৰা লক্ষ্যৰে শৈক্ষিক-সামাজিক- অৰ্থনৈতিক-ৰাজনৈতিক পৰিকল্পনা যুগুত কৰি সময়সাপেক্ষে পদক্ষেপ গ্ৰহণৰ উদ্দেশ্যে কমিটিখন গঠন কৰা হৈছে।জাতীয় সংগঠন দুটাৰ স্পষ্ট কথা অসম পৰামৰ্শদাতা কমিটিয়ে প্ৰয়োজনীয় পৰামৰ্শৰ প্ৰদানেৰে সময়োচিত পদক্ষেপ গ্ৰহণ কৰিব।
গুৰুত্বপূৰ্ণ কথা এই যে কমিটিৰ সদস্যসকল হৈছে-প্ৰাক্তন ৰাজ্যপাল ৰণজিৎ শেখৰ মুছাহাৰী, আন্তৰাষ্ট্ৰীয় খ্যাতিসম্পন্ন চলচ্চিত্ৰ পৰিচালক জাহ্নু বৰুৱা, প্ৰাক্তন অধ্যাপক ডক্টৰ কৃষ্ণ গোপাল ভট্টাচাৰ্য্য, প্ৰাক্তন সহকাৰী অধ্যাপক বসন্ত ডেকা, ধীৰেণ শইকীয়া, আলি হাইদৰ লস্কৰ, ৰাণা চাংমাই, আবু চাহিদ ৰফিকউদ্দিন আহমেদ, সঞ্জয় কুমাৰ তাঁতী, পৃথিৰাজ ৰাভা, সূৰ্য থাওছেন, হুছেইন আহমেদ লস্কৰ, প্ৰণৱজ্যোতি শইকীয়া,প্ৰদীপ কোঁচ।
ইয়াৰ উপৰিও আছু সাধাৰণ সম্পাদক লুৰীণজ্যোতি গগৈ আৰু অসম জাতীয়তাবাদী যুৱ- ছাত্ৰ পৰিষদৰ সাধাৰণ সম্পাদক পলাশ চাংমাই প্ৰাৰম্ভিক কামৰ সমন্বয়ক হিচাপে ৰখা হৈছে।
তাপৰ্যপূৰ্ণ কথা এই যে কমিটিয়ে আগন্তক দিনত যি সমূহ পৰামৰ্শ দিব সেই পৰামৰ্শৰে আগবাঢ়িব অসমৰ বিকল্প ৰাজনৈতিক শক্তি।
সংবাদমেলত উপস্থিত থাকে আছু সভাপতি দীপাংক নাথ, সম্পাদক লোৰিনজ্যোতি গগৈ, উপদেষ্টা সমুজ্জ্বল কুমাৰ ভট্টাচাৰ্য, অসম জাতীয়তাবাদী যুৱ-ছাত্ৰ পৰিষদৰ সভাপতি ৰানাপ্ৰতাপ বৰুৱা, সাধাৰন সম্পাদক পলাশ চাংমাই।
