ASSAM TIMES POST
নগাঁও: দেশ কঁপোৱা অভি-নীল হত্যাকাণ্ডৰ বিচাৰ প্ৰক্ৰিয়া নগাঁও জিলা আৰু সত্ৰ ন্যায়াধীশৰ আদালতত চলি আছে। সম্প্ৰতি সাক্ষীৰ শুনানী প্ৰক্ৰিয়া চলি থকাৰ মাজতে আজি অভি-নীলী হত্যাকাণ্ডৰ মুঠ ৪৮ গৰাকী অভিযুক্তৰ জামিন বিচাৰি সংশ্লিষ্ট আদালতত আবেদন কৰাৰ পিছত এক শুনানী গ্ৰহণ কৰা হয়।
আদালতে দুয়ো পক্ষৰ অধিবক্তাৰ বক্তব্য শুনে যদিও জামিন আবেদন ৰায়টো কাইলৈকে স্থগিত কৰা হৈছে বুলি জানিব পৰা গৈছে। মহামাৰী কৰ’না ভাইৰাছৰ পৰিপ্ৰেক্ষিতত ভাৰচোৱেল ক’ৰ্ট চলি থকাৰ বাবে আজি অভিযুক্ত পক্ষৰ অধিবক্তা মানস শৰনীয়াই ভি ডি অ’ কনফাৰেন্স যোগে তেওঁ আদালতত যুক্তি প্ৰদৰ্শন কৰাৰ বিপৰীতে গোচৰীয়া পক্ষৰ হৈ অধিবক্তা জে কামাৰ তেওঁৰ দুজন সহযোগীৰ সৈতে নগাঁৱৰ চৰকাৰী অধিবক্তা বিভা ফুকনৰ নেতৃত্বৰ অধিবক্তা দলে আদালতত যুক্তি প্ৰদৰ্শন কৰে।
দুয়ো পক্ষৰ যুক্তি শুনাৰ পিছত কাইলৈ জিলা আৰু সত্ৰ ন্যায়াধীশে জামিন আবেদন সন্দৰ্ভত কি সিদ্ধান্ত গ্ৰহণ কৰে, সেয়া লক্ষ্যনীয় হ’ব। উল্লেখ্য যে পুৰ্বেও অভিযুক্ত সকলৰ জামিন বিচাৰি বহুবাৰ আবেদন কৰিছিল যদিও আদালতে সেই জামিন আবেদনসমুহ নাকচ কৰিছিল।
উল্লেখ্য যে বিগত ২০১৮ চনৰ ৮ জুনত কাৰ্বিআংল জিলাৰ ডকমকা আৰক্ষী থানাৰ অন্তৰ্গত পানীজুৰিত গুৱাহাটীৰ দুই যুৱক ক্ৰমে অভিজিৎ নাথ আৰু নিলোৎপল দাসক একাংশ দুস্কৃতিকাৰীয়ে অতি নৃশংস ভাৱে হত্যা কৰিছিল।
এই ঘটনা সন্দৰ্ভত ডকমকা আৰক্ষী থানাত ৰুজু হোৱা ৩৩/২০১৮ নম্বৰৰ গোচৰৰ ভিত্তিত অভিযুক্ত সকলক উক্ত বৰ্ষৰ ১৮ ছেপ্টেম্বৰত নগাঁও আদালতত হাজিৰ কৰোৱা হৈছিল আৰু তেতিয়াৰে পৰা মুঠ অভিযুক্তৰ ৪৮ জনৰ ভিতৰত ৪৭ জন নগাঁও কেন্দ্ৰীয় কাৰাগাৰত আৰু এজন নাবালক হোৱাৰ বাবে যোৰহাট শিশু গৃহতে আছে।
