ASSAM TIMES POST
ডিফু : যোৱা নিশা ডিফুৰ অভিজাত্য হোটেল সিংহাসনত ক’ভিড 19 আক্ৰান্ত ৰোগীৰ কথা পোহৰলৈ অহাৰ পিছত চহৰবাসীৰ মাজত আতংকৰ সৃষ্টি হৈছিল যদিও কাৰ্বি আংলঙ স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙ আৰু জিলা উপায়ুক্ত মুকুল কুমাৰ শইকীয়াই ৰাইজক আতংকিত নহৈ অধিক সজাগ আৰু সতৰ্ক হৈ থাকিবলৈ আহ্বান জনায় ৷ আজি পুৱাৰ ভাগত ডিফু পৌৰ সভাৰ উদ্যোগত অগ্নিনিৰ্বাপক বাহিনীৰ বাহনেৰে হোটেল সিংহাসনৰ চৌহদ আৰু পাৰ্শৱৰ্তী পদপথসমূহ ছেনিটাইজেন কৰা পৰিলক্ষিত হয় ৷
উল্লেখ যোগ্য যে, ক’ভিড19 ৰ ক্ষেত্ৰত পাহাৰীয়া জিলা কাৰবি আংলঙে গ্ৰীণ জ’নৰ সুনাম ধৰি ৰখাৰ ক্ষেতত যতি চিহ্ন আহি পৰাৰ লগতে শেহতীয়াকৈ ৰাজ্যৰ ক’ভিড19 আক্ৰান্তৰ তালিকাত সংযোজন হ’ল চেন্নাই ফেৰৎ কাৰবি আংলঙৰ যুৱকৰ নাম ৷ যুৱকজন পাহাৰীয়া জিলা কাৰ্বি আংলঙৰ বোকাজান মহকুমাৰ ডিলাইৰ বুলি জানিব পৰা গৈছে। যুৱকজন চেন্নাইত কৰ্মৰত আছিল আৰু বিশেষ ৰে’ল সেৱাৰ যোগে ১৬ তাৰিখে গুৱাহাটীত উপস্থিত হয় তাৰ পিছতে কাৰ্বি আংলংৰ জিলা সদৰ ডিফুলৈ লৈ অনা হৈছিল। ডিফুৰ হোটেল সিংহাসনত quarantineত ৰখা হৈছিল যুৱকজনক । যুৱকজনৰ সৈতে গুৱাহাটীৰ পৰা ডিফুলৈ একেখন বাছতেই আন ৬ জন লোক আৰু আহিছিল তেওঁলোক বৰ্তমান হোটেল সিংহাসনতেই quarantine কৰি ৰখা হৈছে । যুৱকজনৰ নাম প্ৰেম তামাঙ । যুৱক জনক ইতিমধ্যে গুৱাহাটীৰ MMCH ত ভৰ্তি কৰোৱা হৈছে । এইলৈ ডিফু চহৰত চেঁপা উত্তেজনাই বিৰাজ কৰিছে ৷
আনহাতে কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ছ’চিয়েল মেডিয়াযোগে জনাইছে যে, ক’ভিড 19 ত আক্ৰান্ত যুৱকজন তামিলনাডুত কৰ্মৰত আছিল আৰু ১৬ মে’ত চেন্নাইৰ পৰা 06144 ট্ৰেইন যোগে গুৱাহাটীলৈ আহে ৷ তাৰ পিছত অইন ২২ জন যুৱকৰ সৈতে বোকাজান মহকুমাৰ ডিলাইৰ নিবাসী ২৪ বছৰীয়া প্ৰেম তামাঙকো AS02 AC 7377 নম্বৰৰ বাছেৰে ডিফুলৈ আনি ডিফু মেডিকেল কলেজ আৰু হাস্পাতালত প্ৰয়োজনীয় স্বাস্থ পৰীক্ষা কৰি ডিফু সিংহাসন হোটেলত কোৱাৰেণ্টাইনত ৰাখে ৷ শেহতীয়াকৈ যুৱক গৰাকী ক’ভিড 19 পজিটিভ পোৱা বুলি জানিব পাৰি স্বাস্থ্য মন্ত্ৰী ডাঃ হিমন্ত বিশ্ব শৰ্মাৰ নিৰ্দেশ মৰ্মে যুৱকগৰাকীক এমএমচিলৈ চ্কিৎসাৰ বাবে প্ৰেৰণ কৰা হয় ৷ এইলৈ ৰাইজক আতংকিত নহে সজাগ আৰু সাৱধান হৈ থাকিবলৈ আহ্বান জনাইছে মুখ্য কাৰ্যবাহী সদস্য তুলিৰাম ৰংহাঙে ৷
আনহাতে পাহাৰীয়া জিলাখনত চেন্নাই ফেৰত যুৱকগৰাকীৰ গাত ক’ভিড পজিটিভ পোৱাৰ পিছত জিলা প্ৰশাসনে জিলাখনৰ প্ৰতিটোকোৱাৰেণ্টাইন চেণ্টাৰত সতৰ্কতা অৱলম্বন কৰাৰ বাবে আদেশ দিয়াৰ লগতে প্ৰয়োজনীয় স্বাস্থ্য পৰীক্ষাৰ ক্ষেত্ৰত অধিক গুৰুত্ব আৰোপ কৰিছে ৷ জানিব পৰা মতে ডিফুৰ কোৱাৰেণ্টাইন চেণ্টাৰত বৰ্তমান মুঠ ১২৪ জন লোক কোৱাৰেণ্টাইন আছে ৷ ইয়াৰে ৮৪ জন চহৰখনৰ বিভিন্ন হোটেলত থকাৰ বিপৰীতে বাকী বাকী ৪০জন কাৰ্বি আংলং স্বায়ত্তশাসিত পৰিষদৰ পৰিবহন বিভাগৰ ১২ কিল’স্থিত ৱৰ্কশ্বপ আৰু ফাৰ্মাৰ্চ হোষ্টেলত আছে৷
