ASSAM TIMES POST
ডিফু : সংযম, কষ্ট আৰু ত্যাগেৰে মাহজোৰা পৱিত্ৰ ৰমজানৰ ৰোজা পালন কৰাৰ পিছত অহা ২৪ মে’ত হ’ব পৱিত্ৰ ঈদ-উল-ফিটৰৰ নামাজ ৷ কিন্ত্ত ক’ভিড 19ৰ মহামাৰী ৰূপৰ বাবে ভাৰতৰ আগশাৰীৰৰ ইছলামিক সংগঠনসমূহে দেশজোৰা চৰকাৰে আহ্বান জনোৱা লকডাউনৰ প্ৰতি সম্মান জনাই মছজিদ বা ঈদগাহৰ বৃহৎ জামাতৰ সলনি ক্ষুদ্ৰ ক্ষুদ্ৰ জামাতেৰে নিজ গৃহতে এইবাৰ ঈদ-উল ফিটৰৰ নামাজ আদায় কৰিবলৈ ইছলাম ধৰ্মালম্বী লোকসকললৈ আহ্বান জনাইছে ৷
এইলৈ ডিফু মছজিদ কমিটিয়েও এইবাৰ ডিফু মছজিদত সমূহীয়া ঈদ- উল- ফিটৰৰ নামাজ আদায় নকৰাৰ সিদ্ধান্ত গ্ৰহণ কৰিছে ৷ ডিফু মছজিদ কমিটিয়ে কেতবোৰ সিদ্ধান্ত গ্ৰহণ কৰিছে ৷ সিদ্ধান্ত মৰ্মে কোনো ব্যক্তিয়ে মছজিদ ঘৰৰ ভিতৰত ঈদৰ নামাজ পঢ়িব নোৱাৰিব, মছজিদ চৌহদৰ লোকেও মছজিদৰ ভিতৰত নামাজ আদায় কৰিব নোৱাৰিব, সামাজিক দূৰত্ব পালনত অসম্ভৱ হোৱা ডাঙৰ জামাতত নামাজ পঢ়াত বাধা আৰোপ কৰা হৈছে লগতে ই বৰ্তমান পৰিস্থিত আইনত দণ্ডনীয় বুলি কোৱা হৈছে ৷
ঈদৰ নমাজত নিম্নতম তিনিজন জামাতীৰ প্ৰয়োজন ৷ নামাজ পঢ়োৱাৰ দক্ষতা থকা যি কোনো লোকে ইমামতি কৰিব পাৰিব ৷ খুতবাৰ বাবে চুটি চুটি ছুৰা ব্যৱহাৰ কৰাৰ লগতে আল্লাহ আকবাৰ, আল্লাহ আকবাৰ লা ই লাহা ইলাল্লাহু আল্লাহু আকবাৰ ওৱা লিল্লাহিল হামদ্ পঢ়িলেও ঈদৰ নামাজ আদায় হ’ব ডিফু মছজিদ কমিটিৰ সাধাৰণ সম্পাদক মজাহাৰুল ইছলামে জানিবলৈ দিছে৷
