ASSAM TIMES POST
ডিফু : কৰ’না ভাইৰাছৰ বাবে পাহাৰীয়া জিলা কাৰবি আংলঙক গ্ৰীণজ’ন হিচাপে ঘোষণা কৰি তৃতীয় পৰ্যায়ৰ লকডাউনৰ ক্ষেত্ৰত কিছু শিথিলতা প্ৰদান কৰাৰ পিছত চহৰখনৰ দোকান-পোহাৰ খোলাৰ ক্ষেত্ৰত জিলা প্ৰশাসনে কেতবোৰ নীতি-নিয়ম নিৰ্দ্ধাৰণ কৰি দিছিল ৷ উক্ত নীতি-নিয়মসমূহ চহৰখনৰ ব্যৱসায়ীসকলে সূচাৰুৰূপে পালন কৰিছে নে নাই তাৰ উমান ল’বলৈ আজি কাৰবি আংলং জিলা প্ৰশাসনৰ হৈ অতিৰিক্ত উপায়ুক্ত ৰাজেশন তেৰাঙে আজি চহৰত এক আকষ্মিক পৰিদৰ্শন কৰে ৷
পৰিদৰ্শন কালত অতিৰিক্ত উপায়ুক্তগৰাকীয়ে লকডাউন শিথিলকৰণৰ নীতি- নিয়ম উলংঘনকাৰী ব্যৱসায়ীসকলক সতৰ্ক কৰি দিয়াৰ লগতে হোটেলসমূহত যাতে গ্ৰাহকে ৰৈ খোৱাৰ ব্যৱস্থা নকৰি ক্ৰয় কৰা সামগ্ৰীসমূহ যাতে গ্ৰাহকে লৈ যায় তাৰ প্ৰতি লক্ষ্য ৰাখিবলৈ নিৰ্দেশ প্ৰদান কৰে ৷ নীতি-নিয়ম নমনা কেইখনমান দোকান বন্ধ কৰাৰো নিৰ্দেশ দিয়ে ৷ অতিৰিক্ত উপায়ুক্তগৰাকীৰ আকষ্মিক পৰিদৰ্শ কালত ডিফু থানাৰ অচি চিৰাজ ইংতি আৰু ডিফু নগৰ আৰক্ষী চকীৰ ভাৰপ্ৰাপ্ত বিষয়া হাওকাম চাংচাঙে অতিৰিক্ত উপায়ুক্তগৰাকীক সংগ দিছিল ৷
